Кэбээйи улууһугар үрүҥ көмүһү оҥорууга хайа-таҥастыыр комплекса үлэлээтэ
Балаҕан ыйын 4 күнүгэр ИЭФ-2019 (ВЭФ) кэмигэр Арассыыйа Федерациятын Бэрэсидьиэнэ Владимир Путин Саха Өрөспүүбүлүкэтин Кэбээйи улууһугар Вертикальное баайдаах сир баазатыгар Хайа-таҥастыыр комплексын үлэлэтиигэ старт биэрдэ.
Владивостокка бу сиэригэр-туомугар РФ Бырабыыталыстыбатын бэрэссэдээтэлин солбуйааччы-УИФУо боломуочуйалаах бэрэстэбиитэлэ Юрий Трутнев, Уһук Илини уонна Арктиканы сайыннарыыга миниистир Александр Козлов кытыннылар. Дьааҥы арҕаа өттүэр Западное диэн уустук суоллаах сиргэ үрүҥ көмүһү хостооһун бырайыагын туһунан Silver Bear Resources Plc. хампаанньа толорооччу дириэктэрэ Вадим Ильчук кэпсээтэ.
Бу баайдаах сиргэ бэйэтигэр оҥорон таһаарыыны үлэлэтиигэ “Прогноз” аахсыйалаах уопсастыба генеральнай дириэктэрэ Анна Федорова кытынна. Кини хамаандатын кытта үрүҥ көмүһү кэмиэрсийэҕэ анаан оҥорууга тиийэ бары түһүмэҕи билэр. Бу баайдаах сири чинчийиини,бырайыактааһыны, тутууну уонна үлэлэтиини.
“Бүгүн сүрүн сорукпутунан Хайа-таҥастыыр комплексын үлэлэтии буолар: 110 туонна руданы таҥастыыр кыахтаах байытар фабриканы уонна сылга 75 туонна үрүҥ көмүһү оҥорон таһаарыыны. Маны сэргэ биһиги болҕомтобутун лицензиялаах сирбитигэр геологическай чинчийиини ыытыы турар. Манна араас таһымнаахтык үөрэтиллибит 36 учаастак минерализацияланар 114 туочуката бэлиэтэнэр”, — диэтэ Анна Федорова.
Комплексы үөрүүлээхтик үлэлэтиигэ Саха Өрөспүүбүлүкэтин бырамыысыланнаска уонна геологияҕа миниистирэ Максим Терещенко, Кэбээйи улууһун баһылыга Иван Левин кытыннылар. Хампаанньа олохтоохтору үлэҕэ ылар баҕалааҕа үөрдэр.
Кэбээйи улууһугар Вертикальное баайдаах сир баазатыгар хайа-таҥастыыр комплексыгар үрүҥ көмүһү оҥорон таһаарыы Silver Bear Resources Plc норуоттар икки ардыларынааҕы хампаанньа тардар үбүнэн олоххо киирэр. Инвестордар Саха Өрөспүүбүлүкэтигэр регистрацияламмыт “Прогноз” кыттыгас хампаанньа нөҥүө 7 млрд солкуобайы уктулар. Бу бырайыак олоххо киирдэҕинэ 2027 сылга диэри нолуокка 1,5 млрд солкуобай киириэҕэ.
Silver Bear Resources хампаанньа аахсыйалара Торонто биржевай фондатыгар эргийэр буолан, хампаанньа мэлдьи форумнарга, кэмпириэнсийэлэргэ, “төгүрүк остуолларга” кыттар. Биһиги Арассыыйа Федерациятын уонна Саха Өрөспүүбүлүкэтин инники күөҥҥэ таһааран, уопуппутун атастаһабыт”, — диэтэ Вадим Ильчук.
Кэбээйи улууһугар уустук суоллаах-иистээх сиргэ Хайа-таҥастыыр комплексын тутуу уонна дьиҥнээхтик үлэлэтии “Прогноз” АУо кэлэктиибин көмөтүнэн кыалынна. Манна даҕатан эттэххэ, хампаанньа үлэһиттэрин 80 бырыһыана – Саха сирин олохтоохторо. “Прогноз” АУо бастыҥнары наҕараадалаата, дьоро киэһэни тэрийдэ.
“Прогноз” аахсыйалаах уопсастыба.