Бэлиитикэ Култуура Сүрүн

Казань олохтоохторо Саха сирин национальнай бибилэтиэкэтин пуондатыгар киирэллэригэр кыах бэрилиннэ



Бэс ыйын 9 күнүттэн Татарстан олохтоохторо Саха сирин национальнай бибилэтиэкэтин сыыппараҕа көспүт пуондатыгар киирэр кыахтаннылар. Тустаах тэрээһин Казань куоракка Саха сирин күннэрин чэрчитинэн барда. Бу Казань сүрүн бибилэтиэкэтигэр бастакы уопут буолар.

edersaas.ru

Ити түмүгэр ааҕааччылар Саха сирин бибилиэтиэкэтин сыыппараҕа көспүт пуондатыгар киирэр кыахтаахтар. Манна 50 тыһыынча кинигэ, докумуон, архыып суруйуулара, буклеттар, хаһыат, о.д.а. харалла сытар. Пуондаҕа көҥүл биэрэр бэлиэ кунуопканы СӨ култууратын уонна духуобунай сайдыытын миниистирэ Юрий Куприянов уонна Татарстан култууратын миниистирин солбуйааччы Дамир Натфуллин баттаатылар.

Бу, мин өйдүүрбүнэн, Култуура саамай толору ис хоһоонноох күннэрэ. Эһиги төһө даҕаны олус ыраах, тэрээһин өттүнэн уустук буоллар, манна Национальнай түмэл да, ойуулуур-дьүһүннүүр искусство даҕаны уонна кэрэхсэбиллээх киинэлэри көрдөрдүгүт. Бэҕэһээ “Тыгын Дархан” киинэни көрдүм, бүгүҥҥү күҥҥэ диэри саныы сылдьабын. Былырыыҥҥы “Ааҕар эрэгийиэн” куонкурус түмүгүн учуоттаатахха, биһиги бибилэтиэкэлэрбит биир бастыҥнарга киирсэллэр. Электроннай пуондаҕа көҥүл биэрии олус интэриэһинэй быраактыка, үчүгэй бырайыагы бэлиэҕэ ылыахпыт дии саныыбын”, — диэн Дамир Натфуллин эттэ.

Саха сирин национальнай бибилэтиэкэтин, дириэктэри солбуйааччы Василий Борисов билиһиннэрдэ. Кини 50-тан тахса тыһыынча сыыппараҕа көһөрүллүбүт саха, нуучча, англия тылларынан докумуоннар аһыллыахтара диэн эттэ. Онон Саха сирин аҕыйах ахсааннаах норуоттарын устуоруйатын, култууратын, литэрэтиирэтин сиһилии билсэргэ кыаҕы биэрэр.

Электроннай бибилэтиэкэ – биһиги эйгэбит көстүүтэ. Биһиги учуонайдары, чинчийээччилэри өйүүбүт, электроннай бибилэтиэкэбититтэн энциклопедическай чахчылары ыйарга көмөлөһөбүт. Электроннай таһаарыы эмиэ баар, наада буоллаҕына таһаарыахпытын сөп. Электроннай абонемент эмиэ баар, бэйэ страницатын, бөлөҕү арыйан сэһэргэһиэххэ сөп. Оннооҕор сакааһынан кинигэни сыыппараҕа көһөрүөхпүтүн сөп. Туһанааччыларга табыгастаах буоларын курдук электроннай бибилэтиэкэҕэ тиэмэлэринэн уонна салааларынан сүүмэрдээһиннэри оҥорбуппут. Ааптар быраабынан көмүскэнэр дэҥҥэ көстөр 20 тыһыынча докумуон электроннай матырыйаалларын Дьокуускайга биһиги бибилэтиэкэбитигэр эрэ кэлэн ааҕыахха сөп. Билигин Казань бибилэтиэкэтин ааҕааччылара эмиэ киирэн билсэр кыахтаннылар. Биһиги көмпүүтэрдэрбит Казань олохтоохторорун айпи аадырыстарын билэн, көҥүл биэрэр буолуоҕа”, — диэн Борисов эттэ.

Бу курдук киирэр туочукалар (көҥүл) Казахстан Өрөспүүбүлүкэтин Национальнай академическай бибилэтиэкэтигэр, СӨ Уһук Илин уокуругун Владивостокка бастайааннай бэрэстэбиитэлигэр, Москваҕа РФ бэрэсидьиэнин иһинэн уонна Санкт-Петербурга СӨ бэрэстэбиитэлистибэлэригэр бэриллибиттэрэ диэн СӨ Култууратын уонна духуобунай сайдыытын министиэристибэтин пресс-киинэ иһитиннэрэр.

 

0
0