«Касперскай лабораториятын» кытта бииргэ үлэлээһин хайысхалара кэҥиир
Саха сирэ «Касперскай лабораториятын» кытта 2013 сылтан бииргэ үлэлиир. Олунньу 21 күнүгэр Ил Дархан Айсен Николаев «Касперскай лабораторията» хампаанньаны төрүттээччини уонна бу тэрилтэ генеральнай дириэктэрин Евгений Касперскайы кытта көрүстэ.
Кэпсэтии сүрүн тиэмэтэ — информационнай куттал суох буолуутугар үлэлиир исписэлиистэри бэлэмнээһин.
— «Касперскай лабораториятын» кытта бииргэ үлэлээһин хайысхатын элбэтэр соруктаахпыт. Бастатан туран, информационнай куттал суох буолуутун хааччыйар исписэлиистэри бэлэмнээһиҥҥэ үөрэх куурустарын ыытыахпыт, — диэн санаатын тиэртэ Айсен Николаев.
— “Кибератааканы” оҥорооччулар ахсааннара элбээн, уопутуран иһэллэр. Ордук бырамыысаланнас уонна энергетикэ салааларыгар куттал суоһуур. Биһиги исписэлиистэрбит күҥҥэ 350-400 тыһыынча вирустаах бырагыраамалары хабаллар. Онон информационнай куттал суох буолуутугар каадырдары бэлэмнээһиҥҥэ анал үөрэх бырагыраамаларынан ХИФУ-ну уонна «Якутия» технопаарканы кытта бииргэ үлэлииргэ бэлэммит, — диэн бэлиэтээтэ Евгений Касперскай.
Евгений Касперскай IT-пааркаҕа сылдьан резиденннэр үлэлэрин кытта билсибитин иһитиннэрдэ. Сорохторун кытта бырайыактара кини салайар тэрилтэтин үлэлиир тосхолун кытта сөп түбэһэринэн, бииргэ үлэлиэн сөптөөҕүн ыйда.
Маны тэҥэ Ил Дархан ыалдьыта “Халыма” тыраассатын устун Тымныы полюһугар Өймөкөөҥҥө уонна Хаандыгаҕа сырыытын кытта санаатын үллэһиннэ, Саха сиригэр туризм сайдыыта олус улахан кэскиллээҕин бэлиэтээтэ.
Бу туһунан СӨ Ил Дарханын уонна Бырабыыталыстыбатын дьаһалтатын пресс-сулууспата иһитиннэрдэ.
Елена ПОТОЦКАЯ, “Саха сирэ” хаһыат.