Саха гроссмейстера Гаврил Колесов бэҕэһээҥҥи билгэтэ туолла: уолаттар тай-брек оонньуур буоллулар.
Бөөлүүн Америка Нью-Йорк куоратыгар Россия уонна Норвегия гроссмейстердара Сергей Карякин уонна Магнус Карлсен бүтэһик, 12-с партияларын тэҥнэһиинэн түмүктээтилэр.
Улахан дьүккүөрдээх оонньуу көстүбэтэ. Оонньооччулар 30-с хаамыыга илии тутустулар. Пресс-конференция кэмигэр Карякин ыалдьааччыларыттан бытаан оонньуутун иһин бырастыы гынарга көрдөстө.
Гаврил Колесов, гроссмейстер, дуобакка аан дойду чөмпүйүөнэ:
— Бу матч хайдах да түмүктэннэр, саахымакка иккиэн чахчы чулуу оонньооччулар буолалларын номнуо дакаастаатылар. Матчка мин (үгүс специалистар даҕаны) Карлсен тулутуо суоҕа дии санаабытым. Карякин да Аан дойду Чөмпүйүөнэ буолуон сөбүн көрдөрдө (баҕар Чөмпүйүөн буолуо даҕаны). Ол эрээри эрдэ эппиппин уларыппаппын — Магнус Карлсен оонньуурун таһымынан, бүгүҥҥү күҥҥэ, ордук. Кини кыайыа.
Салгыы тугуй?
Улуу саахыматчыттар билигин тай-брекка оонньууллара хаалла. Ол аата кылгас бириэмэлээх партиялар. Онно кыайсыбатахтарына, үһүс түһүмэххэ «Армагеддон» диэн партияны оонньуохтара. Бу партияҕа эмиэ тэҥнэһии буоллаҕына, харанан оонньообут саахыматчыт Аан дойду чөмпүйүөнүнэн биллэриллэр.
Прокопий БУБЯКИН.