Бүгүн саахымакка аан дойду чөмпүйүөнүн хоруонатын Магнус Карлсен көмүскээтэ.
Биһиги уолбут Сергей Карякин түргэн тай-брек оонньууга 3:1 ахсаанынан хоттордо. Санатан эттэххэ, кинилэр 12 партия тухары тэҥнэһиинэн түмүктээбиттэрэ (6:6). 12 партия тухары биирдиитэ эрэ кыайсыбыттара, уон төгүл тэҥнэспиттэрэ.
Колесов билгэтэ
Саха гроссмейстера, дуобакка аан дойду чөмпүйүөнэ балар оонньууларын кыраҕытык кэтээтэ уонна Edersaas.ru сайтка матч устата хаста да санаатын этэн кэллэ (урукку таһаарыыларьыгар ааҕыаххытын сөп).
Кини сэтинньи 28 күнүгэр (бүтэһик, 12-с партия иннинэ) биһиги сайпытыгар Колесов икки түгэни билгэлээн турар:
- 12-с партияҕа тэҥнэһиэхтэрэ
- Тай-брекка Карлсен кыайыа
Бастакы билгэтэ туолбутугар биһиги дьаарханан барбыппыт: иккиһэ туолбатар! Бөөлүн иккиһэ эмиэ туолла… Россия спортсмена Нью-йорк куораттан хотторуу аргыстаах айаннаан истэҕэ.
“Карякин наар көмүскэнэн таҕыста”
Матч түмүктэммитигэр, куолубунан, Гаврил Колесовка сибээскэ тахсан кылгас интервью ыллым.
— Гаврил, Карлсен хайдах гынан кыайда, наар тэҥнэһэ олорбут киһитин?
— Түргэн оонньууга 3-с, 4-с партияларын кыайда. Карлсен онньуур кылааhа үрдүк, Карякин матч тухары көмүскэнэ сатаан баран, түргэн оонньууга (тай-брекка – аапт.) сатаан утарсыы оҥорбото… Баҕар сылайыы да баара буолуо.
— Ол аата бытаан оонньууга көмүскэнэр судургу эбит, түргэннээҕэр. Оннук өйдүөххэ сөп дуо?
— Оннук диэххэ сөп.
— Уһуннук сылайбат буолуу (Карлсен) физическэй күүһү көрдөрөр дуу, кылааһы дуу?
— Бу матчка Карлсен кылааhа Карякиннааҕыр үрдүгүн көрдөрдө. Эт-хаан бэлэмэ, биллэн турар, эмиэ наада.
— Баһыыба.
Мэйии да, былчыҥ да
Сорохтор билбэттэрэ буолуо, саахымтачыт Магнус Карлсен өссө хайыһардыыр, баскетболлуур, футболлуур. Футболга оннооҕор күрэхтэһэр. Эт-хаан күүһэ өйгө эмиэ көмөлөһөр дииллэр. Биһиги киһибит Карякин өй оонньуутуттан атынынан дьарыктаммыта иһиллибэт.
Салгыы ФИДЕ президенэ Кирсан Илюмжинов тай-брек иннинээҕи интервьютун көрүҥ:
https://www.youtube.com/watch?v=8DtAimi0oEI
Прокопий БУБЯКИН.