Култуура

«Кармен-сюита» балеты көрүөхпүт

Опера уонна балет тыйаатырыгар, балаҕан ыйын 23-24 күннэригэр, көрөөччүлэргэ аан бастаан Арассыыйа Улахан (Большой) тыйаатырын балетын артыыстара уонна оркестра ураты бырагырааманы бэлэх уунуохтара.
Биллэр-көстөр үлэлээх улахан кэлэктиип гостуруола Саха АССР тэриллибитэ 100 сылынан ыытыллар.
Пресс-кэмпириэнсийэҕэ тыйаатыр пресс-сулууспатын салайар Екатерина Новикова, тыйаатыр солистара гостуруол бырагырааматын туһунан сырдаттылар.
Тыйаатыр номоххо киирбит Майя Плисецкаяҕа анаан туруоруллубут Жорж Бизе – Родион Щедрин «Кармен-сюитатын», маны сэргэ, «Дивертисмент» улахан кэнсиэргэ «Спартак», «Спящая красавица», «Легенда о любви», «Пламя Парижа» уо.д.а. классическай балеттартан быһа тардыылары көрдөрүөхтэрэ.
-Мин Майя Плисецкая үҥкүүлүүрүн куопуйалаабаппын, ол гынан баран, хамсаныыларын, көрүүтүн, кини бу үҥкүү ис хоһоонун өйдүүрүн, ылынарын дириҥник билэргэ, ылынарга кыһалынным. Урут Майя Михайловнаны кытта бииргэ бу испэктээккэ кыттыбыт педагог Виктор Барыкины кытта үлэлээбиппиттэн үөрэбин, табылынным. Кини миэхэ Кармен уобараһын биэрэргэ көмөлөһөр, — диэн кэпсиир солистка, «Кармен» партиятын толорор Кристина Кретова.
РФ үтүөлээх артыыһа Александр Волчков хас биирдии испэктээк хатыламмат уратылааҕын, артыыстар ис дууһаларыттан иэйэн кытталларын бэлиэтиир.
—Мин Дьокуускайга үһүс кэлиим. Публика олус истиҥник көрсүбүтэ уонна ону билигин да оннук көрсүө дии саныыбын. Оттон бу балет кэлэктиибэ уонна оркестр бииргэ Саха сиригэр бастакы кэлиибит. Үгэһи сайыннарыахпыт уонна куруутун гостуруоллуу кэлэр буолуохпут, — диир  Александр Волчков.
Саха сиригэр 112 киһи кэллэ. Кинилэр ортолоругар балет солистара — Ольга Кишнева, Антонина Чапкина, Виктория Якушева, Александр Водопетов, балет труппатын сэбиэдиссэйэ Анна Леонова уонна РФ үтүөлээх артыыһа Виктор Барыкин бааллар.
Арассыыйа Судаарыстыбаннай академическай Улахан тыйаатыра 1776 сыллаахха тэриллибитэ.
СИА хаартыскалара
0
0
Telegram @edersaas20