Саха сиригэр Аксения уонна Наталья Посельская аатынан Балет оскуолатыгар үөрэнэр Карина Чикитова Москваҕа ситиһиилээхтик сылдьан кэллэ. Бу туһунан кинини көрөр-истэр (эппэкиинэ), «Арассыыйа дьахталларын туһугар» норуот баартыйатын бэрэссэдээтэлэ Альбина Черепанова кэпсээтэ.
edersaas.ru
«Биһиги Москваҕа сылдьар ыра санаабыт тута туолбатаҕа. Үөрэхпит, пандемия, ыарыы мэһэйдээбиттэрэ. Ол да буоллар, саҥа сыл тохсунньу ыйа биһиэхэ дьолу тосхойдо.
Биһиги, бастатан туран, Москва устун күүлэйдээтибит. Саҥа дьыллааҕы киэргэтиилэр билигин да тураллар, онон бырааһынньык настарыанньатын биэрдилэр.
Биһиги Москва балетын оскуолаларыгар сылдьар ыра санаалаах этибит. Хата, биллиилээх балерина, билигин педагог, меценат Илзе Лиепаҕа дьарыктанар дьоллоннубут. Биллиилээх балерина эйэҕэстик кэпсэтэр, балет дьиҥнээх кистэлэҥин үллэстэргэ бэлэм. Ону сэргэ, Улахан тыйаатыр артыыстарын эрэпэтииссийэлэрин көрөн, олохпутугар умнуллубат түгэн буолла.
Нуучча түүлээҕин королевата Ирина Крутикованы кытары көрсөр өрдөөҕү былааммытын эмиэ олоххо киллэрдибит.
Улахан тыйаатырга сылдьар ыра санаа остуоруйаҕа тэҥнээх. Биһиги «Драгоценности» балекка сырыттыбыт. Карина улахан сыанаттан харахтарын араарбакка, артыыстар үрдүк көтүүлэрин биир тыынынан көрдө.
Улахан тыйаатыр солиһа, педагог Геннадий Янин: «Карина муусукаҕа уонна үҥкүүгэ олус чугас эбит. Улахан тыйаатыр артыыстарын дьиҥнээх эрэпэтииссийэлэригэр аан бастаан сылдьан төһөлөөх долгуйбутун сэрэйэбин. Маладьыас, уолуйбата. Бэйэтин сэмэйдик, ол гынан баран артыы-артыыс курдук көрдөрдө»,— диэн үрдүк сыанабылы биэрэн долгутта.
Ону сэргэ Москваҕа ОТР «ЗаДело» биэриитигэр уһуллуу эмиэ олус долгутуулаах этэ. Биһиги барыахпыт иннинэ бу туһунан былааннаабатахпыт даҕаны, ол эрэн, этии киллэрбиттэригэр аккаастанар кыахпыт суоҕа.
2014 сыллаахха 4 эрэ саастаах кыысчаан тайҕаҕа 12 күн устата сүппүтүгэр дьоммут-сэргэбит бары долгуйбутун, аймаммытын хаһан да умнубаппыт. Дьолго, ити барыта ахтыыларга эрэ хаалла, ол эрээри, ону санаатахха, хараҕыҥ мэлдьи ууланар. Карина теле-устуудьуйаҕа оччотооҕу каадырдары көрөн эмиэ хараҕын уутун туттуммата…».
Санатан эттэххэ, Альбина Прокопьевна Каринаны кытары 2016 сыллаахха билсэн баран, киниэхэ көмөлөһөр, өйүүр баҕаттан 6 саастаах кыысчааны Дьокуускайга Балет оскуолатыгар аҕалбыта. Карина кинини «сүрэхтээбит ийэтинэн» ааттыыр. Кыысчаан билигин Балет оскуолатыгар 5-с кылааска үөрэнэр, олус үлэһит кыыс.
«Карина, таҥара быыһаабыт кыыһа, иннин диэки эрэллээхтик айанныыр. Мындыр өйдөөх уонна хорсун кыыс. Кинини кытары олох устун айанныыр чэпчэки.
Каринаны өйүнэн-санаатынан өйүүр, көмөлөһөр биһиги норуоппутугар, Т.П.Дмитриева аатынан оҕо сэллигин өрөспүүбүлүкэтээҕи санаторийыгар, Посельскайдар ааттарынан Балет оскуолатыгар, Өлүөхүмэ оройуонун дьаһалтатыгар уонна дьахталларын сэбиэтигэр, «Арассыыйа дьахталларын иһин» норуот баартыйатын дьонугар, доҕотторбор, дьүөгэлэрбэр уонна куруук биһигини кытта буолар бар дьоммор улахан махталлаахпын», — диэн Альбина Черепанова махталын биллэрдэ.
Надежда ЕГОРОВА, «Саха сирэ» хаһыат, edersaas.ru
А.П.ЧЕРЕПАНОВА хаартыскалара