Кардиоцентр Саха сирин олохтоохторун хаачыстыбалаах мэдиссиинэ өҥөтүнэн хааччыйыаҕа

Ааптар: 
Бөлөххө киир:

Саха сиригэр өрөспүүбүлүкэтээҕи кардиология диспансерын (150 куойкалаах кардиососудистай киин) иккис уочаратын тутуута салҕанар.

edersaas.ru

Кардиология киинин тутуута кыраапык быһыытынан баран иһэр. Сыл түмүктэниэр диэри тутар-таҥар үлэтин үмүрүтэр уонна чопчу диагностыыр тиэхиньикэни оннун булларар былааннаахтар. Магнитнай-резонанснай томографтар, көмпүүтэр томографтара, стерилизация аныгы тэриллэрин номнуо аҕалбыттар.

Мэдиссиинэ үрдүк технологиялаах тэриллэрин холбуур-таҥар үлэлэрэ саҕаланнылар. Ону тэҥэ, тустаах киини нейрорадиология уонна кардиорадиология эйгэтин саҥа бырагыраамаларынан хааччыйыахтара.

Саҥа тэрил Кардиология киинэ оҥорор мэдиссиинэ өҥөлөрүн хаачыстыбатын үрдэтиэҕэ уонна ыарыы саҥа саҕаланан эрдэҕинэ диагностыырга көмөлөһүөҕэ. Маннык диспансер тэрилиннэҕинэ Саха сирин олохтоохторо өрөспүүбүлүкэ таһыгар тахсыбакка миэстэтигэр хаачыстыбалаахтык эмтэнэр кыахтаныахтара”, — диэн Ил Дархан Айсен Николаев бэлиэтээтэ.

Өрөспүүбүлүкэтээҕи 1-кы нүөмэрдээх балыыһа генеральнай дириэктэрэ Станислав Жирков бэлиэтииринэн, саҥа кииҥҥэ улахан коронарнай синдромнаах, инфарктаабыт уонна инсуллаабыт ыарыһахтар эмтэниэхтэрэ.

Мэдиссиинэ икки тэрилтэтин үлэһиттэриттэн хамаанда тэриллэр – бу Өрөспүүбүлүкэтээҕи 1-кы нүөмэрдээх балыыһа исписэлиистэрэ – Мэдиссиинэ национальнай киинэ уонна Өрөспүүбүлүкэтээҕи 2-с нүөмэрдээх балыыһа – мэдиссиинэ суһал көмөтүн киинэ. Ону тэҥэ, СӨ Доруобуйатын харыстабылын министиэристибэтин иитинэн тус сыаллаах үөрэммит үлэһиттэр киириэхтэрэ. Исписэлиистэр А.Н. Бакулев аатынан сүрэх-тымыр хирургиятын мэдиссиинэ национальнай чинчийэр киинэ уонна Е.Н. Мешалкин аатынан хаан эргиирин патологиятын института курдук дойду билимҥэ инники күөҥҥэ сылдьар кииннэригэр үөрэммиттэрэ”, — диэн Станислав Жирков иһитиннэрдэ.

Эбийиэк 90 % бэлэм, тутуу хаамыытын уонна тэрили атыылаһыыны сакаасчыт – СӨ Судаарыстыбаннай сакаасчытын сулууспата тэрилтэ хонтуруоллуур.

СӨ Ил Дарханын уонна СӨ Бырабыыталыстыбатын пресс-сулууспата.

+1
0
+1
0
+1
0
+1
0
+1
0
+1
0
+1
0