Бүгүн, олунньу 15 күнүгэр, СӨ Ил Дархана Айсен Николаев ыыппыт мунньаҕар Дьокуускай куоракка кардиология киинин ыйыллыбыт болдьоҕор киллэрэргэ бырабыыталыстыба тутууга блогун, Доруобуйа харыстабылын министиэристибэтин, судаарыстыбаннай сакаасчыт сулууспатын уо.д.а. эппиэтинэстээх структуралар өттүлэриттэн суһал быһаарыыны эрэйэр боппуруостары көрдүлэр.
edersaas.ru
Cаха Өрөспүүбүлүкэтин доруобуйатын харыстабылыгар дьоһун суолталаах эбийиэк үлэҕэ болдьоҕор киириэхтээх. Кардиология өрөспүүбүлүкэтээҕи диспансерын ыйыллыбыт болдьоҕор уонна хаачыстыбалаахтык тутан үлэҕэ киллэрэргэ эппиэтинэстээх структуралары барыларын түмүү ирдэнэр.
«Кардиология диспансера муус устартан эмтэнээччилэри көрөн-истэн барарын туһугар, тутуу үлэтэ бүтүннүүтэ бу сыл бастакы кыбартаалыгар түмүктэниэхтээх. Онтон атын буолуон сатаммат. Билигин номнуо олунньу ортото буолбутун учуоттаатахха, үлэ барыта ыйтан ордук кэм иһигэр бүтүөхтээх», -– диэн Ил Дархан Айсен Николаев тоһоҕолоон бэлиэтээтэ.
Өрөспүүбүлүкэ бырабыыталыстыбатыгар тутар-таҥар үлэлэр хаамыыларын, судаарыстыбаннай тутуу надзорун түмүк бэрэбиэркэтин күн аайы хонтуруоллааһын эрэһиимигэр киирэргэ эттэ. Билигин эбийиэк бэлэмэ — 97%, онтон таҥыы үлэтин уонна мэдиссиинискэй тэриллэри олордууну учуоттаатахха — 88%.
Эбийиэккэ маны сэргэ судаарыстыбаннай тутуу надзорун уорганнарын ыйыыларын туоратарга үлэ барар, түмүк бэрэбиэркэ олунньу 22 күнүгэр буолуоҕа. Эбийиэккэ 80-ча киһи үлэлии сылдьар. Ону таһынан үрдүк технологиялаах мэдиссиинискэй тэриллэри тиэрдээччилэр уонна инженердэр үлэлииллэр. Ыарахан тэриллэр 90% олордулуннулар уонна таҥылыннылар. Билиҥҥитэ диспансер 5, 6 уонна 8-с этээстэрэ толору туттарылыннылар. 2 уонна 4 этээстэр олунньу бүтүөр диэри бүтэриллэллэрэ былааннанар, эпэрээссийэлиир блоктар олохсуйуохтаах 7-с этээс кулун тутар 8 күнүгэр диэри үлэтэ түмүктэниэҕэ. Бу туһунан судаарыстыбаннай сакаасчыт сулууспатын генеральнай дириэктэрэ Петр Кушкирин иһитиннэрдэ.
СӨ доруобуйатын харыстабылын миниистирэ Лена Афанасьева эппитинэн, кардиология диспансерыгар 521 мэдиссиинискэй үлэһит штата ирдэниллэр. Министиэристибэ мэдиссиинискэй каадырдары сүүмэрдииргэ үлэни ыытта, мэдиссиинискэй каадырдар тиийэллэр.
Надежда ЕГОРОВА, «Саха сирэ» хаһыат, edersaas.ru
А.СОРОКИН (СИА) хаартыската