Дьокуускайга 150 куойкалаах өрөспүүбүлүкэтээҕи кардиологическай диспансеры тутуу 2019 сылга саҕаланыаҕа. Маннык быһаарыыны кулун тутар 14 күнүгэр Арассыыйа Бырабыыталыстыбатын вице-премьерэ – Арассыыйа Бэрэсидьиэнин Уһук Илин федеральнай уокуругар боломуочуйалаах бэрэстэбиитэлэ Юрий Трутнев салалтатынан Уһук Илин уонна Байкал регионун социальнай-экэнэмиичэскэй сайдыыларын боппуруостарыгар Бырабыыталыстыба хамыыһыйатын Уһук Илиҥҥэ уонна Байкал регионугар инвестиционнай бырайыактары олоххо киллэрии боппуруостарыгар хос хамыыһыйатын мунньаҕар ылыннылар.
“Саха сиригэр кардиологическай диспансер тутуллуоҕа, бу өрөспүүбүлүкэҕэ туһалаах эбийиэк. Арассыыйа Доруобуйаҕа харыстабылын министиэристибэтэ бу этиини эмиэ өйүүр”, — диэтэ хамыыһыйа мунньаҕын түмүктүүрүгэр боломуочуйалаах бэрэстэбиитэл эттэ.
2019-2021 сылларга Саха Өрөспүүбүлүкэтин экэнэмиичэскэй үүнүүгэ кииннэрин социальнай сайдыытын эрдэ бигэргэммит былааныгар эбии үс эбийиэги киллэрэр туһунан Саха сирин баһылыга Айсен Николаев этии киллэрбитэ.
Өрөспүүбүлүкэ баһылыга, туох-ханнык иннинэ, Дьокуускайга 150 куойкалаах 4 млрд 597 мөл. солкуобай суумалаах өрөспүүбүлүкэтээҕи кардиологическай диспансеры тутууну эбии киллэрэн биэрэргэ эппитэ. Бу улахан бырайыак доруобуйа харыстабылыгар дьоһун суолталаах социальнай эбийиэгинэн буолар. “Кардиологическай диспансеры тутуу нэһилиэнньэ сүрэх-тымыр ыарыыларыттан өлүүтүн аччатыаҕа”, — диэбитэ Айсен Николаев.
Санатан эттэххэ, Арассыыйа Бэрэсидьиэнэ Владимир Путин “ыам ыйынааҕы” “2024 сылга диэри Арассыыйа Федерациятын сайдыытын национальнай сыалларын уонна стратегическай соруктарын туһунан” 204 №-дээх Ыйааҕар 100 тыһыынча нэһилиэнньэҕэ 450 түгэҥҥэ диэри хаан эргиирин ыарыыларыттан өлүүнү аччатарга сорудахтаабыта.
Маны сэргэ өрөспүүбүлүкэ баһылыга туһааннаах былааҥҥа Хаҥалас микро-оройуонугар оскуола-саады тутууну уонна сылы эргиччи үлэлиир “Полярная звезда” оҕо сынньалаҥ уонна чэбдигирдэр киинин киллэрэргэ көрдөспүтэ. Николаев оскуола-саады “Кангалассы” индустриальнай паарка” ТОСЭР ситиһиилээхтик олоххо киирэр Хаҥалас бөһүөлэгэр тутулларын чопчулаабыта.
Саха сирин баһылыгын этиилэрин Арассыыйа Федерациятын Уһук Илини уонна Арктиканы сайыннарыыга миниистирэ Александр Козлов өйөөбүтэ. Саха сирин Ил Дархана этии киллэрбит саҥа эбийиэктэрэ федеральнай киинтэн социальнай-экэнэмиичэскэй сайдыы кииннэрин сайыннарыыга бэриллэр “биир кэлим субсидия” суотугар тутуллуохтара. Хос хамыыһыйа саҥа үс эбийиэккэ эбии үбү – 6 млрд 598 мөл. 900 тыһ. солкуобайы биэрэргэ уураах таһаарда.
Маны сэргэ Саха сиригэр быйыл СӨ экэнэмиичэскэй сайдыытын кииннэрин социальнай сайдыыларын былааныгар эрдэ киирбит 5 эбийиэк олоххо киириэҕэ.
Саха Өрөспүүбүлүкэтин Ил Дарханын уонна Саха Өрөспүүбүлүкэтин Бырабыыталыстыбатын пресс-сулууспата