Саха сиригэр Өрөспүүбүлүкэтээҕи кардиологическай киин тутуллан бүтэн эрэр. Бүгүҥҥү күҥҥэ тутуу 90%-а бэлэм буолбут. Эбийиэги бу сыл бүтүүтэ үлэҕэ киллэрэллэр, онон 2022 сыл бастакы кыбартаалыттан эмтэнии саҕаланыаҕа.
Өрөспүүбүлүкэҕэ суолталаах тутуу хайдах баран иһэрин туһунан Айсен Николаев салалталаах суһал ыстаап бэҕэһээ мунньахха кэпсэттэ. «Кэлэр 2022 сыл бастакы аҥаарыттан үлэлиир туһугар, тутуу сүрүнэ бу сыл бүтүөр диэри түмүктэниэхтээх», — диэн Ил Дархан бэлиэтээтэ.
«Служба госзаказчика» тэрилтэ генеральнай дириэктэрин Петр Кушкирин иһитиннэриитинэн, эбийиэги бэлэм диэххэ сөп. Тутуу былаһааккатыгар 180-тан тахса киһи үлэлии сылдьар. Билигин вентиляцияны тардаллар, муостатын оҥороллор, истиэнэ кырааскалыыллар уонна ааннары туруора сылдаьллар. Итиэннэ ыарахан уйуктаах тэриллэри туруораллар. Мэдтэриллэри, миэбэллэри атыыласпыттар, ол номнуо өрөспүүбүлүкэҕэ кэлбит.
Тутар-мантаастыыр үлэлэр ахсынньы 20 күнүгэр түмүктэнэллэрэ күүтүллэр.
Аҕыс этээстээх кардиокиин уопсай иэнэ 15 тыһыынча кв.миэтэрэҕэ тэҥнэһэр.
Ил Дархан уонна Бырабыыталыстыба дьаһалтатын пресс-сулууспата.
СИА хаартыската.