Мария Караваева Өлөөн эбэҥки национальнай оройуонун дьаһалтатын ыччат дьыалаларыгар исписэлииһинэн үлэлээбитэ биир сыл буолла. Кини былырыын баччаларга II-с өрөспүүбүлүкэтээҕи “Арктика ыччата” форумҥа ситиһиилээхтик кыттан, быйыл Сочига ыытыллыбыт Бүтүн аан дойдутааҕы ыччат уонна устудьуоннар бэстибээллэригэр кыттар сертификат тутан үөрбүтэ-көппүтэ. Номнуо биир сыл элэҥнэччи ааһан, Мария ыччат лидерэ буолан сайдан, уопутуран, ыралаабыт бэстибээлигэр кыттан кэллэ. edersaas.ru
— “Арктика ыччата” форумҥа “Арктикаҕа туризм сайдыыта — Өлөөн улууһун холобурунан” диэн бырайыакпын көмүскээбитим. Ыччат бэстибээлигэр кыттарбын туоһулуур сертификаты тутаммын, олус соһуйбутум уонна үөрбүтүм. Маннык улахан тэрээһиҥҥэ кыттар буолбутум миэхэ улахан чиэс уонна наҕараада этэ. Бэстибээлгэ хас биирдии күн интэриэһинэй лиэксийэлэр, санаа атастаһар былаһааккалар, быыстапкалар буоллулар. Онно хас биирдиитигэр аан дойдуну биир гына аатырбыт лектордар, мотиватордар, үөрэхтээхтэр кэлэн кыттыыны ыллылар, салайдылар. Биир кэмҥэ олус элбэх интэриэһинэй тэрээһин ыытылынна, киһи онно барытыгар сылдьыан, билиэн-көрүөн баҕарар. Ону ситиһээри, үгүспүт сууккаҕа үстүү-түөртүү эрэ чаас утуйа сырыттыбыт. Ордук ыччат дьыалаларыгар Федеральнай агентство салайааччытын солбуйааччы Екатерина Драгунова ыыппыт былаһааккатын сэҥээрдим, манна граннардаах куонкурустар тустарынан кэпсээбитэ. Өссө РФ Ааҕар-суоттуур балаататын бэрэссэдээтэлэ Татьяна Голикова бэйэтинэн кэлэн аан дойду ыччатыгар олоххо тутуһар уон туһалаах сүбэтин үллэһиннэ.
— Бэстибээлгэ кыттыбытыҥ эйиэхэ тугу биэрдэ дии санаатыҥ? Туох санааҕа кэллиҥ?
— Ыччат бэстибээлиттэн астынным. Үйэбэр хатыламмат күннэр буолан аастылар, бэйэбэр олус элбэх саҥаны арыйдым. Аны урукку-хойукку санааларбын сааһылаан, бэстибээлтэн ылбыт билиилэрбин туһанан, бырайыактарбын олоххо киллэриэм. Дойдубар, Өлөөн улууһугар, Ыччат сэбиэтин мунньан аан дойду ыччата тугунан тыына олорорун, туох кыһалҕалар баалларын, бэстибээл хайдах ааспытын үллэстиэм.
— Өлөөнтөн хас киһи буолан кытынныгыт?
— Өлөөн улууһуттан төрдүө буолан кыттыыны ыллыбыт. “Оленек синема” оҕо куруһуогун салайааччы, режиссер Юрий Ефимов, табаһыттар аан дойдутааҕы үһүс конгресстарын иһинэн ыытыллыбыт көлүүлээх табаны сүүрдүүгэ чөмпүйүөн Петр Федоров, мас тардыһыы былаһааккатын тэрийээччинэн Айсен Семенов уонна Национальнай библиотека дириэктэрин солбуйааччы Өлөөнтөн төрүттээх Мария Андреева. Уһун айаны айаннаан, Сочига үктэммиппит. Таһымнаах тэрээһиҥҥэ сылдьыбыппытыттан дьоммут, улууспут олохтоохторо олус үөрэллэр. Чуолаан, өрөспүүбүлүкэбит салалтатыгар уонна оройуоммут баһылыгар Александр Степанович Ивановка махталбытын тиэрдэбит.
Хаартыскаҕа: Мария — ортоку.
Айтана Аммосова, «Саха сирэ» хаһыат, edersaas.ru