“Бүгүҥҥү күҥҥэ оҕолору эрдэ каникулга ыытыы боппуруоһа турбат” диэн доруобуйа харыстабылын миниистирэ Елена Борисова брифинг кэмигэр иһитиннэрдэ.
Кини этэринэн, бүгүҥҥү күҥҥэ оскуола иннинээҕи саастаах оҕолор тэрилтэлэригэр тумуулааһын ахсаана былырыыҥҥы көрдөрүүттэн намыһах. Ол эрээри, сорох улуустарга тэйиччиттэн үөрэтиигэ, харантыыҥҥа барбыт кылаастар, оскуолалар бааллар.
Быраабыла быһыытынан, кылааска, бөлөххө тумуулаабыт оҕо ахсаана 20%-тан тахса буоллаҕына, дириэктэр, эбэтэр баһылык тэйиччиттэн үөрэтиигэ, эбэтэр эрдэттэн каникулга, харантыыҥҥа ыытыан сөп.
Оттон улахан дьоҥҥо тумуунан, ОРВИ-нан ыалдьыы элбээн иһэр. Ону тэҥэ, бу кэмҥэ кирииптэн быһыыны хаһааҥҥытааҕар да элбэхтик ыллылар. Билиҥҥитэ Москваттан кэлбит вакцина 97%-нын номнуо ыллылар. Ол сэтинньигэ ыарыы ахсаанын аҕыйатарга көмөлөөх буолуо.
Санатар буоллахха, алтынньы 13 күнүгэр Ил Дархан ыйааҕа тахсыбыта. Ол чэрчитинэн, тумуулаабыт киһини кытары алтыспыт киһи дьиэҕэ олорон үлэлиэхтээх. Оттон коронавируска анаалыһа бигэргэммит киһини кытары алтыспыт киһи “больничнайга” барыахтаах.
Ангелина Васильева, «Саха сирэ» хаһыат, edersaas.ru