Ил Дархан Айсен Николаев үөрүүлээх тэрээһиҥҥэ кыттыыны ылла. Бу 220/100 миэстэлээх оскуола-сад икки этээстээх, таһырдьа оонньуур уонна спортивнай балаһааккалардаах.
«2016-2017 сс. хаарбах оскуола оннугар саҥаны тутабыт дуу, суох дуу мөккүөр баарын өйдүүбүн. Мин оччоттон, Кангаласс Дьокуускай сайдыытын төһүүтэ буолуохтаах диэн толкуйдаах этим. Манна аан бастакы урутаан сайдар территория арыллыбыта, саҥа производстволар уонна технологиялар баар буолбуттар. Оҥорон таһаарыы сайыннаҕына өссө да атын социальнай объектары салгыы тутуохпут. Бөһүөлэги кэрэ кэскил кэтэһэр», – диэтэ Айсен Николаев. Кини сорудаҕынан Дьокуускай дьаһалтата «Шахтёр» спортивнай киини эмиэ саҥардыахтаах.
Оскуола дириэктэрэ Савелий Адамов этэринэн, тутуу 2019 сыллаахха саҕаланан баран, бэрт сотору силигин сиппит.
«Оскуолабыт аныгы тиэхиньикэнэн уонна тэрилинэн толору хааччыллыбыт. Туспа лабораториялаахпыт, кыргыттары ас астыырга, кулинарнай технологияны баһылыырга, иискэ үөрэтэр кабинеттардаахпыт, уолаттарга аналлаах лазернай станоктардаахпыт, библиотекалаахпыт, спортзаллаахпыт, улахан актовай саалалаахпыт», – диэн кини үөрэ-көтө кэпсиир.
Аны оскуолаҕа «Кангаласскай» разрезка таас чоҕу хостообут үлэһиттэри үйэтитэр мусуойу арыйбыттар. Үөрэнээччилэри мусуой дьыалытыгар эмиэ үөрэтиэхтэрэ.
Үөрэх кыһатын Уһук Илиҥҥэ экэнэмиэкэ кииннэрин сайыннарар бырагыраама чэрчитинэн, полпред Юрий Трутнев сорудаҕынан туппуттар.
СӨ Ил Дарханын уонна Бырабыыталыстыбатын Пресс-сулууспата.
Мария Васильева хаартыската (СИА)