Кангаласс бөһүөлэгэр тутуллар саҥа оскуола-уһуйаан ахсынньыга үлэҕэ киириэхтээх
Ыам ыйын 22 күнүгэр Ил Дархан Айсен Николаев «Дьокуускай куорат» уокуругун Кангаласс микрооройуонугар 220/100 миэстэлээх оскуола-уһуйаан саҥа дьиэтин тутуу хайдах баран иһэрин бэрэбиэркэлээтэ.
5 тыһыынчаттан тахса кв м. иэннээх икки этээстээх дьиэ 2020 сылтан тутуллан саҕалаабыта. Эбийиэк СӨ экэниэмикэтин үүннэрэр кииннэр социальнай сайдыыларын былааныгар сөп түбэһиннэрэн Уһук Илини сайыннарыы тэрээһиннэрин үбүлээһин чэрчитинэн тутуллар. Оскуола-уһуйааны үлэҕэ киллэрии 2021 сыл ахсынньытыгар былааннанар.
Бүгүҥҥү туругунан эбийиэк тутуута 57,1% тэҥнэһэр. Акылаат баалкаларын бетоннааһын, цоколь монолит учаастактарын оҥоруу ону таһынан таһынааҕы истиэнэлэр үлэлэрэ түмүктэннэ.
Билигин тутуу биригээдэтэ кырыыһаны тэлгэтии, вентиляция систиэмэтигэр, уоту тардыыга, иһинээҕи истиэнэни оҥоруу уонна канализацияны киллэрии үлэтигэр ылыста.
«Главстрой» МК дириэктэрэ Алексей Варламов иһитиннэрбитинэн, тутуу матырыйааллара былааннаммыт болдьохторугар аҕалыллыбыттар. Эбийиэккэ барыта 72 киһи, ону тэҥэ кыраан, погрузчик, экскаватор үлэлииллэр.
Бэрэбиэркэ түмүгэр Ил Дархан Айсен Николаев эппиэтинэстээхтэргэ туһаайан, эбийиэк тутуутун тэтимин бытаардыбаттарыгар сорудахтаата. СӨ Бырабыыталыстыбатын Бэрэссэдээтэлин бастакы солбуйааччы Кирилл Бычковка туһаайан Дьокуускай куорат баһылыга Евгений Григорьевы кытары Кангаласс микроройуонугар баар «Шахтер» успуорт сааланы чөлүгэр түһэрии кыаҕын көрөллөрүгэр сорудахтаата.
Андрей Сорокина хаартыскаҕа түһэриитэ