Кангалас баһаарынай чааһын үлэһиттэрэ сыл аҥаара буолан баран хоһуттан аччыктааһын бырачыаһын биллэрдилэр. Бу туһунан Нэһилиэнньэ куттал суох буолуутун судаарыстыбаннай кэмитиэтин бэрэссэдээтэлэ Юрий Зайцев иһитиннэрдэ.
Бу сыл муус устар ыйыгар Кангалас баһаарынайдара кыра хамнаһы, уоту умулларыыга анал таҥас тиийбэтин бырачыастаан аччыктааһыны биллэрбиттэрэ. Өрөспүүбүлүкэ салалтата уонна баһаарынайдар биир тылы буланнар, бырачыас тохтообута. Ол эрэн, сыл аҥаара эрэ ааһан баран, бырачыастаабыт баһаарынайдарбыт эмиэ аччыктаан саҕалаатылар. Саха сирин баһаарынайдарын идэлээх сойууһун салайааччыта Юрий Холтосунов этэринэн, аччыктааһын бырачыаһыгар 14 киһи кыттыста. Бырачыас сүрүн төрүөтүнэн, муус устарга баттаммыт сөбүлэҥ боротокуол толоруллубата буолбут. “Муус устарга бырачыас түмүгүнэн, Юрий Зайцев илии баттааһыннаах боротокуол толоруллубута. Боротокуол сүрүн пууна, үлэлээбит чаастарбытын төлөөһүн, толоруллубата. Холобура, биһиги нэдиэлэҕэ 140 чаас үлэлиэхтээхпит. Ол оннугар биһигини 183-192 чаас үлэлэтэн баран, эбии үлэлээбит чаастарбытын төлөөбөттөр”, — диир Юрий Холтосунов.
Юрий Зайцев, Нэһилиэнньэҕэ куттал суох буолуутун судаарыстыбаннай кэмитиэтин бэрэссэдээтэлэ:
— Кангалас микро-оройуонун баһаарынай чааһын биэс үлэһиттэрэ аччыктааһын бырачыаһын биллэрдилэр. Киһи бэйэтин кырдьыгын инник ньыманан ситиһиэн баҕарар буоллаҕына,онно толору бырааптаах. Көрдөһөр, ааттаһар санаабыт суох. Бу кыһалҕаны быһаарар икки мунньах ыыппыппыт эрээри, биир тылы кыайан булбатыбыт.
Балаһыанньаны быһаарсаары, Саха сирин борокоротуурата бырачыастаабыт үлэһиттэр, нэһилиэнньэҕэ куттал суох буолуутун судаарыстыбыннай кэмитиэт, үлэ иниспиэксийэтин уонна идэлээх сойуус бэрэстэбиитэллэрин кытта мунньах тэрийдэ. Бырачыас сүрүн биричиинэтинэн, эбии үлэлээбит чаастарыгар төлөммүт хамнаһы мыыныы буолбут. Нэһилиэнньэҕэ куттал суох буолуутун судаарыстыбыннай кэмитиэт этэринэн, кинилэр ирдэбиллэрин толорорго эбии 500 мөл солкуобай көрүллүөн наада. Муус устардааҕы сөбүлэҥинэн, 44,4 мөл. солкуобай эбии төлөммүт. Мунньах түмүгүнэн, идэлээх сойуус федерациятын кытта үлэ иниспиэксийэтин үлэһиттэрэ суһар бэрэбиэркэ тэийиэхтэрэ. Бырачыастаабыт үлэһиттэр салалталарыгар бырачыаһы тохтотор миэрэтэ ылыныҥ диэн ирдэбил туруордулар.
Санатан эттэххэ, Кангалас баһаарынай чааһа Арассыыйа Ыксаллаах быһыыга-майгыга министиэристибэтин систиэмэтигэр киирсибэт. Бу баһаарынай чаас Саха Өрөспүүбүлүкэтин бүддьүөтүттэн үбүлэнэр.
Николай Попов, «Саха сирэ» хаһыат, edersaas.ru