ОДьКХ министиэристибэтэ тэрийбит «төгүрүк остуолугар» кирдээх ууну (канализация) сокуоннайа суохтук сүөкүүр түгэҥҥэ, ыстараап кээмэйин 100 төгүл үрдэтиэххэ диэн этии киллэрдилэр.
edersaas.ru
«Канализация уутун сокуоннайа суохтук сүөкээһиҥҥэ, ыстараап кээмэйин 100 төгүл, ол аата 100 тыһ. солкуобайга диэри үрдэтэр туһунан уларытыыны киллэриэххэ диэн куорат дууматын дьокутааттарын иннигэр тыл көтөҕөр санаалаахпытын, Дьокуускай куорат мэриятыгар биллэрдибит», — диир «Водоканал» АУо генеральнай дириэктэрэ Гаврил Левин.
Саха сирин айылҕатын харыстабылын кэмитиэтин салайааччыта Кирилл Алчин бэлиэтээбитинэн, 2017 сылга 30 суоппар кирдээх ууну сокуоннайа суохтук канализация ситимигэр сүөккээн эппиэккэ тардыллыбыт. «Маннык буруйу оҥорууга ыстараап 1000 эрэ солкуобай буолара кыра дии саныыбын»,- диэн Кирилл Алчин бэлиэтиир.
Дьокуускайга кирдээх ууну таһар 80-ча массыына үлэлиир. Онтон 30-та чааһынай хампаанньалар киэнэ. 45 эрэ массыына уу тоҕор ыстаансыйаҕа быраабыланы кэспэккэ аҕалар диэн ОДЬКХ министиэристибэтин пресс- сулууспата иһитиннэрэр.
Николай Попов, «Саха сирэ» хаһыат, edersaas.ru