Алтынньы бүтүүтэ Канадаҕа күн аайы 300 тыһ. кэриҥэ тираһынан тарҕанар “Глоб энд Мейл” хаһыакка «Саҥа сиргэ саҥа тылы үөрэтии» диэн ыстатыйа бэчээттэнэн тахсыбыта. Бу ыстатыйаны Канадаҕа уонтан тахса сыллааҕыта олохсуйбут саха дьахтара Надежда Семенова суруйбут. Бу – кини аангылыйа тылынан суруйууга бастакы холонуута. Надежда нуучча тылынан арамааннары суруйар эбит.
Надеждалыын Канадаҕа олохсуйуу уонна айар үлэ туһунан интэриниэт нөҥүө кэпсэттибит:
— Мин Ньурба улууһун Чаппандатыгар төрөөбүтүм. Өрөспүүбүлүкэтээҕи физико-математическай оскуоланы бүтэрэн, Санкт-Петербург куоракка үөрэнэ барбытым. Университекка үөрэнэ сылдьан кэргэн тахсыбытым. Кэргэним үлэтинэн Канада визатын ылбыта, онон Торонтоҕа 2007 сыллаахха дьиэ кэргэнинэн көспүппүт. Үс уол оҕолоохпут: улахан уолбут – худуоһунньук, ортобут – психолог идэлээх, кырабыт – онус кылаас үөрэнээччитэ. Оҕолорум төрүттэрин үгэстэрин, култуураларын интэриэһиргииллэр.
Айар үлэ туһунан
— Хаһааҥҥыттан айар үлэҥ саҕаламмытай?
— Кыра сылдьаммын оҕо суруйааччыта буолар баҕа санаалааҕым, ол эрээри бу санаам син биир туолбат диэн ыраланан бүппүтүм. Кэлин диссертациябын көмүскээн, Дьокуускайга тыа хаһаайыстыбатын академиятын экэнэмиичэскэй факультетыгар үлэлээбитим, онтон Санкт-Петербурга трениннэри ыыппытым. Ол курдук, бастакы арамааммын 2005 сыллаахха суруйбутум. Ону Москваҕа кинигэ кыһатыгар бэчээккэ ыыппытым. Аныгыс сылыгар “Центрполиграф” кыһатыгар бэчээттэнэн тахсыбыта. Салгыы иккис кинигэм 2007 сыллаахха бэчээттэммитэ. Билигин “Нечаянный Роман” диэн саҥа арамааным тахсаары сылдьар. Бу айымньыга күнүүлэһэр аҕас-балыс кыргыттар туһунан суруйдум.
— Туох тиэмэҕэ арамааннары суруйаҕын?
— Бастаан суруйарбар жанрга араарбат этим. Ол иһин “Трудно быть счастливой” диэн бастакы кинигэбин “дьахтар арамаана” диэбиттэригэр соһуйбутум. Мин айымньыларым дьоруойдара – олоххо миэстэлэрин булуон, дьоллоох буолуон баҕарар дьахталлар. Ону кытта олоххо үөрэтэр дьайыылар уонна дьон туһунан суруйарбын сөбүлүүбүн. Маны таһынан, дьүөгэбин кытары “PobolTalki” диэн ютуб-ханааллаахпыт. Манна оҕолорго анаан остуоруйалары кэпсиибит, ырытабыт. Хас биирдии остуоруйаҕа улахан уолум иллюстрация уруһуйдуур.
Сахалар – Канадаҕа
— Оттон Канадаҕа сахалар элбэххит дуо? Төһө түмсүүлээххитий?
— Биһиги олорор куораппытыгар, Торонтоҕа, Канада үрдүнэн саамай улахан саха диаспора баар. Манна биир дойдулаахтар түмсэммит Ыһыах ыһабыт уонна Ороһуоспаны бэлиэтиибит. Быйылгы ыһыахпытыгар 55 киһи мустубута. Оһуокайдаан, күрэхтэһэн, бириэмэбитин бэркэ атаарбыппыт.
Бу курдук, Канадаҕа биир дойдулаахпыт айа-тута үлэлии олорорун истэн олус үөрдүбүт. Биллэр-көстөр, улахан суолталаах хаһыакка бэчээттэнии, араамааннары суруйуу, биллэн турар, олус кэрэхсэбиллээх дьыала буолар. Надеждаҕа саҥа айымньылары, таһаарыылаах үлэни баҕарабыт!
Айтана Аммосова
Хаартыскаҕа: сахалар – Канадаҕа, дьоруойбут уҥаттан үһүс турар.