Кальвица уонна Көбөкөн нэһилиэктэрин олохтоохторун сэрэтэр сыалтан көһөрөллөр
Атырдьах ыйын 8 күнүнээҕи, ойууру харыстыыр суһал ыстаап киэһээҥҥи мунньаҕын түмүгүнэн, СӨ бырабыыталыстыбатын бэрэссэдээтэлин бастакы солбуйааччы Дмитрий Садовников Кэбээйи улууһун Кальвица бөһүөлэгэр баар баһаар балаһыанньата уустугунан сибээстээн, нэһилиэнньэлээх пууну эрдэттэн сэрэтэр сыалтан олохтоохтору көһөрөөрү метеору уонна парому ыыппыттарын эттэ. Ытык Күөлтэн ууну кутар тэриллээх Ми-8 бөртөлүөт көмөҕө барбыт.
Ону тэҥэ, Нам улууһун Көбөкөн нэһилиэгин (Харыйалаах с.) олохтоохторун сэрэтэр сыалтан көһөрүү саҕаланна диэн иһитиннэрдэ. Билиҥҥитэ 60 киһи көстө. Баһаар Фрунзе сэлиэнньэтин диэкиттэн Көбөкөн нэһилиэгин диэки баран иһэр. Өрт сэлиэнньэттэн 4 км сиргэ баар. Уоту утары 47 киһи, булууктаах үс МТЗ тыраахтар үлэлиир. Эбии 12 киһини ыыппыттар. Көбөкөн нэһилиэгэр билиҥҥитэ ууну ыһар тэриллээх Ми-8 бөртөлүөт тиийбит.
Дмитрий Садовников, от буорах кэриэтэ умайар буолан, баһаар куттала суоһуур сэлиэнньэ олохтоохторугар туһаайан, бэлэмнээбит отторун нэһилиэнньэлээх пууннар тас өттүлэригэр таһааралларыгар эттэ. Ону таһынан, бөһүөлэк тула өттүнээҕи минерализацияламмыт балаһалартан куруҥу уонна кэрдиллибит маһы ыраастыылларыгар сорудах бэриллибитин бэлиэтээтэ.
edersaas.ru