Кадеттар подлодка хамандыырын көрүстүлэр

Бөлөххө киир:

Бүгүн муус устар 13 күнүгэр Дьокуускайдааҕы кадетскай интэринээт-оскуолаҕа иккис рангалаах хапытаан Тихон Афанасьевич Матвеевы бары кылаастар стройдаан, ньиргиччи чиэс биэрэн көрүстүлэр.

Байыаннай хайысхалаах оскуолаҕа маннык көрсүһүү хайаан да наада. Онон үөрүүлээх быһыыга-майгыга көрсүһүү эдэркээн оҕолорго умнуллубат үтүө түгэнинэн буолла.

Тихон Афанасьевич 1950 сыллаахха Амма оройуонун Лээги нэһилиэгэр төрөөбүтэ. 1975 сыллаахха С.О.Макаров аатынан Тихоокеанскай байыаннай-морской училищены бүтэрбитэ. Муора байыаннай флотугар атомнай уу аннынааҕы лодка (оҥочо) хамандыырынан сулууспалаабыта.

Кини иккис рангалаах хапытаан, билигин Петропавловск-Камчаткаҕа олорор. Бу күннэргэ төрөөбүт сиригэр-уотугар дьаарбайа кэлэ сылдьар эбит. Бүгүҥҥү тэрээһиҥҥэ «ЮНАРМИЯ” диэн бүтүн Арассыыйатааҕы уопсастыбаннай байыаннай-патриотическай хамсааһын ыстаабын салайааччыта Александр Николаевич Кузьмин, кадетскай оскуола дириэктэрэ Алексей Александрович Корякин уонна “Кэскил” оҕо таһаарыытын сүрүн эрэдээктэрэ Татьяна Ильинична Жиркова сырыттылар.

Бочуоттаах ыалдьыттарга анаан 7-c кылаас үөрэнээччилэрэ — барабанщиктар роталара уонна”Альфа” диэн спецназ хамаандата анал нүөмэр көрдөрдүлэр. Көрсүһүү кэмигэр оҕолор Тихон Афанасьевичка ыйытыылары биэрдилэр, оттон кини оҕолорго байыаннай сулууспа, уу устун уһун айаҥҥа сылдьар киһи ханнык хаачыстыбаларынан баһылыахтааҕын, ону сэргэ дьиэ кэргэн, чугас дьон оруолларын туһунан сүбэ-ама биэрдэ, санаатын үлэһиннэ.
Тэрээһин түмүгэр бочуоттаах ыалдьыты кытта хаартыскаҕа түстүлэр.


Кадетскай оскуола тус архыыбын хаартыскалара туһанылыннылар.

Ульяна ЗАХАРОВА.

+1
0
+1
0
+1
0
+1
0
+1
0
+1
0
+1
0