Саха Өрөспүүбүлүкэтин Ил Дархана, спортивнай тустуу федерациятын салайааччыта Айсен Николаев Instagram-ҥа баар страницатыгар Дьокуускайга буолаары турар көҥүл тустууга аан дойду Кубогар анаммыт саҥа сайт үлэтин саҕалаабытын туһунан иһитиннэрдэ. Бу туһунан Ил Дархан, бырабыыталыстыба пресс-сулууспата иһитиннэрдэ.
edersaas.ru
Сайтка www.yakutskworldcup2019.org аадырыһынан киирэн (инстаграм-ҥа аккауна — @yakutsk_worldcup_2019) күрэхтэһии туһунан бары сонуннары кытта билсиэххэ сөп. Манна күрэхтэһии кыттыылаахтара, дэлэгээссийэлэр, спорду сэҥээрээччилэр наадыйар, интэриэһиргиир информацияларын булуохтара. Портал “Турнир сонуннара”, “Күрэхтэһии бырагыраамата”, “Аан дойду Кубогын устуоруйата” диэн рубрикалардаах. Олорго турнир ыытыллыбыт дойдуларын, куораттарын туһунан билиһиннэрэр матырыйааллар, Кубокка кыттар хамаандалар састааптара киэҥ истиигэ таһаарыллыахтара. Билигин англиялыы тылынан матырыйааллар бэлэмнэнэллэр.
Эрдэ иһитиннэриллибитин курдук, Саха Өрөспүүбүлүкэтин Ил Дархана Айсен Николаев дойду спортивнай тустууга федерациятыгар быйылгы Кубогы Дьокуускайга ыытар туһунан этии көтөхпүтэ. Айсен Николаев көҕүлээһинин Тустуу холбоһуктаах эйгэтэ (UWW) 2018 сыл ахсынньы 26 күнүгэр ылыммыта.
Санатан эттэххэ, эр дьон ортотугар көҥүл тустууга аан дойду Кубога бу дьыл кулун тутар 15-17 күннэригэр Дьокуускайга, “Триумф” Спорт киинигэр буолуоҕа. Онно аҕыс дойду — Япония, Грузия, Куба, Турция, Монголия, Иран, АХШ уонна Арассыыйа хамаандалара күөн көрсүөхтэрэ.
Роман Попов, edersaas.ru
Хаартыска Интэриниэттэн ылылынна.