Көтөрү иитэр Дьокуускайдааҕы фабрикаҕа племенной куурусса сымыыта кэллэ
«Дьокуускайдааҕы көтөр фабриката» АУо Великобритания «Hy-line international» хампаанньатын кытары сыллата племенной куурусса сымыытын атыылаһарга дуогабар түһэрсэр.
edersaas.ru
Муус устар 19 күнүгэр Амстердам куоратынан эргийэн, Дьокуускайга Великобритания «Hy-line international» хампаанньатын икки племенной пиэрмэтиттэн 87 тыһ. куурусса сымыыта анал таһаҕас сөмөлүөтүнэн аҕалылынна. «Дьокуускайдааҕы көтөр фабриката» АУо көтөрү иитэр комплексын инкубационнай сыаҕар угулунна.
Таһаҕаһы Великобританияттан арыаллаан, көрөн-истэн аҕалбыт Россельхознадзор Саха сиринээҕи управлениетын исписэлиистэрэ табаар бары ирдэбилгэ сөп түбэһэрин, хонтуруол кэмигэр туох да кэһии тахсыбатаҕын бэлиэтииллэр. Санатан эттэххэ, Кэлим испииһэккэ киллэриллибит тас дойдулартан табаары киллэрии булгуччулаах бэтэринээринэй хонтуруолга ылыллар.
«Hy-Line International» – аан дойду ырыынагар 70 сыл устата үлэлээбит уопуттаах, сымыыт хайысхалаах көтөрдөрү ууһатыыга идэтийэр сэлиэксийэлиир бөдөҥ хампаанньа. Кини ууһатан таһаарар кросс боруода кууруссалара холку темпераменнаах, бөҕө иммунитеттаах, тулуурдаах уонна үчүгэй төрүөхтээх боруода быһыытынан биллэллэр.
«Дьокуускайдааҕы көтөр хампаанньата» АУо бу хампаанньаны кытары 2016 сылтан үлэлиир. Саҥа боруода кууруссалар бородууксуйа оҥоһуллуутун таһымын, хаачыстыбатын үрдэтиигэ, итиэннэ Ил Дархан тыа хаһаайыстыбатын сайдыытын стратегиятын туһунан ыйааҕар сымыытынан хаачыллыыны 65 %-ҥа тиэрдэргэ эппитин толорууга төһүү буолуохтара. Хаһаайыстыба базатын хаҥатыыга утумнаахтык үлэлиир, сылга 62 мөл сымыыты таһаарар.
Раиса Сибирякова, «Саха сирэ» хаһыат, edersaas.ru