Быйыл Пасха бырааһынньыга ыам ыйын 2 күнүгэр түбэһэр. Православнай бырааһынньык иннинэ Ленскэйдээҕи, Саха сиринээҕи архиепископ, владыка Роман Дьокуускайдааҕы көтөр фабрикатыгар сымыыттары сибэтии гынна. Куорат олохтоохторо үгэс курдук маннык сымыыттары кэтэһэллэр.
Былырыын баччаларга фабрика сууккаҕа 140 тыһыынча сымыыты хомуйара, быйыл 215 тыһыынча сымыыты хомуйар буоллулар. Маны тэҥэ, сымыыт көрүҥэ эмиэ элбээтэ. Ап-араҕас уоһахтаах, элбэх каротиноидтаах “Солнышко” диэн сымыыты атыыга таһаарар буоллулар.
Сыллата көтөр фабриката бородууксуйатын ахсаанын элбэтэн иһэр. 2019 сыллаахха 59,5 мөлүйүөн устуука сымыыты, 2020 сылга 68,6 мөлүйүөн устууканы атыылаабыттара, быйыл 77 мөлүйүөн устуука сымыыты оҥорон таһаарар былааннаахтар.
Дьокуускайдааҕы көтөр фабриката Ньурбатааҕы көтөр фабрикатын улааппыт чоппуускаларынан, Нерюнгритээҕи, Мииринэйдээҕи фабрикалары саҥа тахсыбыт чоппуускаларынан хааччыйар. Ол курдук, быйылгы сыл бастакы кыбаарталыгар 106 тыһыынча чоппуусканы номнуо тиэртэ диэн тыа хаһаайыстыбатын министиэристибэтин пресс-сулууспата иһитиннэрэр.
Ангелина Васильева, “Саха сирэ” хаһыат, edersaas.ru