2024 сылтан Дьокуускайдааҕы көтөр фабриката сыллата 100 мөлүйүөн сымыыты оҥорон таһаарар былааннаах. Ол туһунан бырабыыталыстыба бэрэссэдээтэлин солбуйааччы Михаил Никифоров олохтоох оҥорон таһаарыы боппуруостарынан тэриллибит бырабыыталыстыба мунньаҕар эттэ.
Оҥорон таһаарыыны элбэтэр соругу Айсен Николаев «О стратегических направлениях развития сельского хозяйства» уурааҕын чэрчитинэн, ылыммыттара. 2024 сылга олохтоох сымыытынан хааччыллыы 65%-ҥа тиийиэхтээх. Онно туһуламмыт былааннаах үлэ ыытыллар. Дьокуускайдааҕы көтөр фабрикатыгар былырыын 80 тыһыынча кууруссаҕа аналлаах саҥа сыах арыллыбыта, ол көмөтүнэн сылга 83 мөлүйүөн сымыыты оҥорон таһаарар кыахтаммыттара.
Михил Никифоров этэринэн, быйыл икки сыахха өрөмүөн ыытыллыахтаах. Биир сыахха анаммыт тэрил номнуо кэлэн сытар. Таҥыытын ыам ыйыттан саҕалыахтара. Онон фабрика бары сыахтарын саҥардыы үлэтэ салҕанар.
Ону тэҥэ, көтөр этин бэлэмниир аныгылыы сыах тутуллуохтаах. Биигин манна бырайыактыыр, симиэтэтин оҥорор үлэ ыытыллар. Оччотугар куурусса сибиэһэй этинэн хааччыллыы эмиэ элбиэҕэ.
Ангелина Васильева, “Саха сирэ” хаһыат, edersaas.ru
Хаартыска: sakhagov.ru