Бэҕэһээ, балаҕан ыйын 27 күнүгэр, Саха Өрөспүүбүлүкэтин Судаарыстыбаннаһын күнүн бэлиэтиир уопсастыбаннас үөрүүлээх мунньаҕар, С.А.Зверев-Кыыл Уола аатынан СӨ Үҥкүү национальнай тыйаатырын солиһа, РФ уонна СӨ үтүөлээх артыыһа Афанасий Дмитриевич Афанасьевка “Саха Өрөспүүбүлүкэтин норуодунай артыыһа” үрдүк аат иҥэрилиннэ.
Бу үрдүк наҕараадатын туппут бэлиэ күнүгэр Афанасий Дмитриевичкэ тута төлөпүөннээн, эҕэрдэлээтибит, онуоха кини:
— Норуодунай артыыс буолбуппунан өрөспүүбүлүкэм дьоно барыта эҕэрдэлиирэ олус долгутуулаах. Ис сүрэхпиттэн үөрдүм. Дьоммор-сэргэбэр бука барыларыгар истиҥник махтанабын! Махталбын ыытабын тапталлаах дойдум Тааттам олохтоохторугар уонна ийэбэр, тыыл, үлэ бэтэрээнэ Мария Алексеевна Афанасьеваҕа! Мин Ытык Күөлгэ оскуолаҕа кыра кылаастарга үөрэнэр сылларбыттан Августа Федоровна Клакинова салайааччылаах «Доҕордоһуу» ансаамбылга дьарыктанаммын, үҥкүүнү олус сөбүлээбитим. Онтон салгыы үөрэнэн, үлэлээн, идэтийбит артыыс буоллум. Норуодунай профессиональнай үҥкүүгэ сахалартан бастакынан норуот артыыһын үрдүк аатын сүгүүм миигин олус элбэххэ эбээһинэстиир. Дойдум, өрөспүүбүлүкэм туһугар өссө күүскэ, айымньылаахтык үлэлиэм! — диэтэ.
Бары ытыктыыр, таптыыр артыыспытын бу улахан ситиһиитинэн өссө төгүл эҕэрдэлиибит, дьонун-сэргэтин үөрдэ, искусство Алгыстаах аартыгынан, саҥаттан-саҥа кыайыыларга бу курдук айаннатан иһэригэр баҕарабыт!
Биһиги харахпыт далыгар үүнэн-сайдан тахсыбыт айылҕаттан айдарыылаах үҥкүүһүппүт, балет артыыһа Афанасий Афанасьев чаҕылхай талаанынан, өр сыллаах айымньылаах, кыһамньылаах үлэтинэн, чахчы даҕаны норуотун билиниитин ылыан ылла.
Татьяна МАРКОВА.
Ыспыраапка:
Афанасий Дмитриевич Афанасьев 1963 сыл алтынньы 18 күнүгэр Таатта улууһугар Ытык Күөл с. төрөөбүтэ.
Ленинград куоракка «Ленконцерт» иһинэн эстрада искусствотын айар мастарыскыайыгар 2 сыл балет артыыһын идэтигэр үөрэнэн кэлэн, Сахатын сиригэр 1979-1980 сс. Судаарыстыбаннай үҥкүү ансаамбылын солиһынан үлэлээбитэ.
1983 с. дойдутугар ытык иэһин толорон, Забайкальскай байыаннай уокурукка сулууспалыы сылдьан, 1 сыл үҥкүү-ырыа ансаамбылыгар үҥкүүлээбитэ.
1986 с. Москватааҕы Култуура институтугар балетмейстер идэтигэр үөрэнэ киирбитэ (педагог И.В.Смирнов), 1990 с. ситиһиилээхтик бүтэрбитэ.
1994 сылтан Сергей Зверев-Кыыл Уола аатынан СӨ Үҥкүү национальнай тыйаатырын солиһа. «Бохсуруйуу» балекка Хотой, Уол, Кырдьаҕас Ойуун, «Лолита» балекка Гумберт, о.д.а. айымньыларга үгүс чаҕылхай оруоллардаах. Афанасий Афанасьев саха үҥкүүлэрин, классическай партиялары уонна аныгылыы истииллээх, араас норуоттар үҥкүүлэрин сөбүлээн толорор.
Кини – Биэс континент куонкуруһун лауреата (Дижон, Франция), үрүҥ көмүс мэтээл (1999). СӨ Үрдүкү Сэбиэтин Бочуотунай грамотатынан наҕараадаламмыта (1999). Таатта улууһун Бочуоттаах гражданина.
Татьяна Маркова, «Саха сирэ» хаһыат, edersaas.ru