Нэһилиэнньэттэн сайабылыанньаны тутуу үлэтин тупсарар туһуттан социальнай гаас тардыытыгар сайабылыанньаны биэрии көһө сылдьар пууна үлэлиэҕэ. Бу туһунан социальнай гаастааһын эрэгийиэннээҕи ыстаабын уочараттаах мунньаҕар этилиннэ. Мунньах ырыппыт сүрүн боппуруоһуонан дойдуга уонна аан дойдуга экэниэмикэҕэ быһыы- майгы уларыйыытын усулуобуйатыгар социальнай гаас тардыы былааннарын толоруу буолла.
Ыстаап чилиэннэрэ этэллэринэн, Арассыыйаны утары аан дойдутааҕы санкциялар киллэриллибиттэрин үрдүнэн, билигин даҕаны социальнай гаастааһын бырагырааматын олоххо киллэрии бигэргэммит былаанынан баран иһэр. Өрөспүүбүлүкэ үгүс улуустарыгар социальнай гаас киллэрии бырагырааматыгар киирсэр дьиэлэр реестрдарын саҥардыы түмүктэннэ. «Сахатранснефтегаз» этэринэн, хампаанньаҕа сир аннынааҕы уонна тутар-монтажтыыр үлэлэри толорорго туһааннаах тэриллэр, сапчаастар толору хааччыйарга аналлаах сапаастара баар.
Сайабылыанньаны нэһилиэнньэттэн тутууну уонна улуустааҕы дьаһалталар үлэлэрин тупсарар туһуттан «Сахатранснефтегаз» генеральнай дириэктэрэ Алексей Колодезников сорудаҕынан социальнай гаас тардыыга сайабылыанньаны биэрэргэ аналлаах көһө сылдьар пууннар үлэлиэхтэрэ. Ону тэҥэ кулун тутар 11 күнүттэн Горнай, Нам уонна Хаҥалас улуустарыгар бу үлэҕэ сыһыаннаах методическай уонна практическай көмө оҥоһуллара күүтүллэр. Бу дьаһаллар сайабылыанньаны биэрии бары түһүмэхтэрин түргэнник ааһарга көмөлөһүөхтэрэ.
«Саха сирэ» хаһыат, edersaas.ru
Хаартыска ЯСИА