Нацбырайыактар

Көһө сылдьар мэдиссиинискэй комплекстар улуустарга тиийэллэр

САССР 100 сылынан, “Доруобуйа харыстабыла” национальнай бырайыак чэрчитинэн уонна РФ бырабыыталыстыбатын өйөбүлүнэн, Саха Өрөспүүбүлүкэтэ 14 мэдиссиинискэй комплекстаах.
edersaas.ru

Бэлэм комплекстаах  “КАМАЗ” массыына ыраах сытар нэһилиэктэр олохтоохторугар мэдиссиинискэй чинчийиигэ уонна диспансеризацияҕа айанныыр. Көһө сылдьар мобильнай комплекстар Алдан, Үөһээ Бүлүү, Кэбээйи, Мэҥэ Хаҥалас, Нам, Ньурба, Сунтаар, Томпо, Уус Алдан, Хаҥалас, Чурапчы, Ленскэй, Уус Маайа уонна Үөһээ Дьааҥы оройуоннарын Киин балыыһаларыгар бэрилиннилэр.
Массыыналарга тонометр, электрокардиограф, гемоглобин, глюкоза уонна холестерин анализатора, спирометрия уонна пульсоксиметрия аппарааттара, стетоскоп, ыйааһын, кольпоскоп, эми-тому харайарга холодильник уо.д.а. бааллар. Көмпүүтэрдээх үлэлиир миэстэ баара наадалаах мэдиссиинискэй докумуоннары  электроннай көрүҥүнүнэн толорон чахчылар уопсай базаларыгар ыытарга көмөлөһөр.

«Мобильнай комплекстар сүрүн соругу толороллор – ыраах сытар нэһилиэнньэлээх пууннарга  хаачыстыбалаах мэдиссиинискэй көмөнү хааччыйаллар, эмтэнээччилэр улуустааҕы Киин балыыһаҕа бараллара да наадата суох буолар”, — диэн Саха сирин Ил Дархана Айсен Николаев бэлиэтээн эттэ.

СӨ доруобуйа харыстабылыгар миниистирэ Лена Афанасьева:

«Көһө сылдьар комплекс үтүө өрүтүнэн биир айаҥҥа биэлсэр уонна учаастактааҕы быраас эрэ буолбакка, “узкай” исписэлиистэр тэҥҥэ үлэлииллэрэ буолар”, — диэтэ.

РФ бэрэсидьиэнэ Владимир Путин көҕүлээбит  национальнай бырайыактара 2019 сылтан саҕаламмыттара. “Доруобуйа харыстабыла” национальнай бырайыак нэһилиэнньэ өлүүтэ аҕыйыырыгар, мэдиссиинискэй тэрилтэлэргэ каадыр тиийбэтин тохтоторго, нэһилиэнньэни барытын ыарыыны сэрэтэр мэдиссиинискэй көрүүнэн хабарга хайысхаланар.

Надежда ЕГОРОВА, «Саха сирэ», edersaas.ru

0
0
Telegram Whatsapp