«Култуура» национальнай бырайыак чэрчитинэн өрөспүүбүлүкэ биэс култуурунай киинигэр көһө сылдьар култуурунай киин-автокулууп бэриллиэҕэ.
Бу туһунан култуура уонна духуобунай сайдыы министиэристибэтин пресс-сулууспата иһитиннэрдэ. Бу «КамАЗ» эбэтэр «Газель» массыынаҕа тиэйиллэ сылдьар хомуллар сыаналаах, уоттаах-күөстээх тэриллээх автокулууптары ыһыахтарга, гостуруолларга о.д.а. айанныы сылдьар тэрээһиннэргэ туттуохха сөп.
— Саха АССР 100 сыллаах үбүлүөйүгэр анаан РФ Култуура министиэристибэтиттэн көрдөөбүппүтүн өйөөтүлэр. Быйылгы сылга көһө сылдьар автокулуупатары Табаҕатааҕы «Кедр» КДь (Дьокуускай к. уокуруга), В.В. Никифоров -Күлүмнүүр аатынан «Тойон Мүрү» Култуура киинэ (Уус Алдан улууһа), Федот Потапов аатынан Амматааҕы норуот айымньытын дьиэтэ, Бүлүү улууһунааҕы култуура сайдыытын уонна норуот айымньытын киинэ, Үөһээ Бүлүүтээҕи норуот айымньытын киинэ ылыахтара, — диэн иһитиннэрдэ култуура уонна духуобунас сайдыытын миниистирэ Юрий Куприянов.
Елена ПОТОЦКАЯ, “Саха сирэ” хаһыат, edersaas.ru
Хаартыска — Табаҕа сэлиэнньэтин инстаграмыттан.