Уопсастыба

Күүстээх тыалтан остуолбалар суулуннулар

Сөкүүндэҕэ 20 м түргэннээх тыал саба үрэн Дьокуускайга оптуобус тохтобулларын, остуолбалары, аҕыраадалары суулларда. Киин куорат үөрэх управленията иһитиннэрбитинэн, төрөппүт оҕотун маннык тыалга оскуолаҕа ыыта суоҕун сөп. 

Күүстээх тыалтан сылтаан Кангаласс-Суотту уонна Дьокуускай-Бэстээх хайысхатынан өрүһү туоруур паром сырыыта тохтоото. Ону сэргэ өрүһү туоратар мотуордаах оҥочолор үлэлэрин эмиэ тохтоттулар.

Дьиэ таһыгар турар тиэхиньикэлэр тыалтан эмсэҕэлээтилэр. Оннооҕор гараас сарайын профлииһэ хастанан, турар массыына үрдүгэр түспүт хаартыската социальнай ситимҥэ тарҕанна.

Онон метеорологтар сүбэлииллэринэн, тутуу ыытылла турар сирин чугаһынан, тимир атахха тирэммит рекламнай баннердар аттыларынан ааспат ордук.

 

Ульяна ЗАХАРОВА.
Хаартыскалар интэриниэт ситимиттэн туһанылыннылар.

2
0
Telegram Whatsapp