Чурапчы нэһилиэгин Күрүө Тумуһун мууһа бэҕэһээ тимир көлөнөн туолла. Чурапчы нэһилиэгин биир кэрэ миэстэтэ, Липпэлээх күөл Күрүө Тумус салаатыгар, дьиҥнээх эр дьон тимир көлөлөрө, тыа сирин олоҕун салайар сүрүн тиэхиньикэ муһунна. Модун күүстээх «МТЗ-82», норуокка биллэринэн, бөлөрүүс тыраахтардар күрэхтэрэ Чурапчы улууһугар иккис төгүлүн ыытыллар.
Семен ЖЕНДРИНСКЭЙ, “Саҥа олох” хаһыат, Чурапчы улууһа.
33 бөлөрүүс
«Күүстээх көлө-2017» күрэхтэһиини В.И. Давыдов бэрэссэдээтэллээх улуус «Эркин» эр дьонун түмсүүтэ Аҕалар өрөспүүбүлүкэтээҕи сийиэстэригэр анаан тэрийдэ. Уопсайа түөрт улуустан (Амма, Мэҥэ Хаҥалас, Таатта, Чурапчы) 33 тыраахтар кытынна. Кинилэр истэригэр былырыыҥҥы «Тимир Көлө» кыайыылаахтара эмиэ кыттыыны ыллылар.
Күрэхтэһии
Бу кэнниттэн күрэхтэһии бастакы чааһыгар, теория (тест) боппуруостарыгар эппиэттээтилэр. Хас биирдии көрүҥ аайы «Эркин» улуустааҕы эр дьон түмсүүтүн чилиэннэрэ судьуйалаатылар. Күрүө Тумус күөл кытылыгар дьон «лыык» курдук муһунна. Хорчуоппа тэриллэн, итии чэйи, минньигэс аһы атыылаатылар. Көрөөччүлэр ортолоругар ат сүүрдүүтүн тэҥэ, ким бэйэтин нэһилиэгин, улууһун тыраахтара кыайыытын билгэлээн, харчыга уксуу да баар буолла. Ким биэтэккэ инники кэлэригэр көр-күлүү аҥаардаах тылынан мөккүһэн да ыллылар. Чахчы даҕаны тырахтарыыстар ох курдук оҥостон, былырыыҥҥыттан лаппа уопутуран кэлбиттэрэ тута көһүннэ. Тыраахтары киэргэтии, симээһин чааһыгар баай, ураты толкуйдаах уолаттар көһүннүлэр: «Огненный орел» умайа кытарбыт хотой ойуулаах тыраахтар, «Чикаго Булс» тумсунан буруонан уһаарар көлө, аннынан турбиналаах тиэхиньикэ о.д.а.
Иккис практическай чааһыгар күөлгэ икки тыраахтар тэҥинэн киирэллэр, ол эрэн, хардарыта туран илин-кэлин түһэллэр. Старт бэрилиннэ да, туох баар муҥутуур күүстэринэн анал бэлиэтэммит «гараас» иһиттэн бырысыап холбонон тахсаллар, иилинээт, сүүрдэн тиийэн бэйэ-бэйэлэриттэн алталыы миэтэрэ тэйиччи хаарга батары анньыллыбыт былаахтары эргийэ «змейкэлээн» ааһаллар, итиэннэ бэлиэтэммит сирдэригэр бырысыаптарын төттөрү анньан киллэрэн, араарынаат, биэтэккэ сүүрэн тиийэллэр. Кыайыылааҕы бириэмэнэн көрөн быһаараллар. Бу күрэххэ маҥнай сүүрээччилэргэ халыҥ хаары хайытан киириилэрэ уустук этэ, ол кэннэ хас биирдии тырахтарыыс-машинист бэйэтин сатабылынан, маастарыстыбатынан бииртэн-биир үчүгэй бириэмэлэри көрдөртөөтө.
Улуустарынан тарҕанна
Манна даҕатан эттэххэ, бу Чурапчы улууһугар «Тимир көлөнү» аан маҥнай тэрийэн ыытыахтарыттан бу сылга үс араас улууска ыытыллара былааннанар. Холобура, былырыын Горнай улууһуттан тиийэ кыттааччы баар буоллаҕына, быйыл Горнайга тэриллэр буолан, ол тырахтарыыс кыттыыны ыла кэлбэтэ.
Саамай эдэр, саамай кырдьаҕас
Быйылгы күрэххэ “Саамай эдэр кыттааччы” – 22 саастаах Иван Сысолятин буолла. «Саамай аҕа кыттааччы» — Роман Петрович Степанов 58 саастаах.
Кыайыылаахтар
1 миэстэ – Спартак Максимов, Чурапчы улууһун Төлөй нэһилиэгин тырахтарыыһа
2 миэстэ — Федор Макаров, Чурапчы улууһун Чурапчы сэлиэнньэтин тырахтарыыһа
3 миэстэ — Никифоров Гаврил, Таатта улууһун Дэбдиргэ нэһилиэгин тырахтарыыһа
Спонсордар
Сүрүн бириистэр спонсордара:
- Квадроцикл — уопсастыбаннай түмсүүлэр уонна улуус тэрилтэлэрэ
- «Чезет» карабин саа — Чурапчы улууһун дьаһалтата
- МТЗ-82 тыраахтар кэлин көлүөһэтин кэмпилиэгэ – «Аграрнай партия» улуустааҕы салаата
Семен ЖЕНДРИНСКЭЙ, “Саҥа олох” хаһыат, Чурапчы улууһа.
ВИДЕО: