Уус Алдаҥҥа бара сылдьан, Бороҕоҥҥо чааһынай гостиницаҕа түспүтүм. Гостиницаны Алдана Троева диэн эдэр ийэ саҥа арыйан үлэлэтэн эрэр. Дьиктитэ диэн, улуус киинигэр мантан атын гостиница суох этэ. Сэлиэнньэ килбэйэр киинигэр турар саҥа таас дьиэ аллара этээстэригэр кафе, парикмахерскай, офистар бааллар.
Үөһээҥи этээһигэр баар гостиницаҕа барыта “тып” курдук ыраас, сылаас. Өрөмүөн, миэбэл, утуйар таҥас – барыта саҥа. Хоско иккилии, үстүү оронноох. Аныгылыы сымнаҕас матараастаах, кырыылаах гына өтүүктэммит утуйар таҥастаах, соттордоох саҥа ороҥҥо киһи сынньанан турар. Толору хааччыллыылаах буолан, туалет, суунуу-тарааныы өттүгэр кыһалҕаны көрсүбэккин. Өссө аптамаат массыынаҕа таҥаскын сууйтарыаххын сөп. Оттон хонук сыаната удамыр.
Онон дьиҥнээх гостиницаҕа сынньаммыт курдук сананаҕын. Кистэл буолбатах, үгүстүк командировкаларга сылдьар киһи тыа сиригэр араас гостиницалар баалларын билэр. Үксүгэр эргэ интэринээти уларытан оҥорбут буолаллар. Оттон манна ыалдьыттарга сыһыаннара да ураты эйэҕэс буолан биэрдэ. Хоско графиннаах уу турар, баҕардаххына, подноска кэмпиэттээх, бэчиэнньэлээх итии чэйи аҕалан биэрэллэр.
Алдана дьиэни куортамҥа ылбыт, миэбэлин Новосибирскайга сакаастаан аҕалтарбыт. Кини баантан кирэдьиит ылбатах, арай, улуустан субсидиянан туһаммыт эбит.
Кини 3 кыра оҕолоох ийэ диэтэххэ, дьыалаҕа хорсуннук ылсыспыт. Үлэһит ыла илигинэ, гостиницатыгар күнүстэри-түүннэри бэйэтэ хонор, сууйар-сотор эбит. Күн аайы уонча хоһу, көрүдүөрү, туалеты сууйуу-сотуу, сүүрбэччэ утуйар таҥаһы сууйтарыы, өтүүктээһин, бэрээдэги көрүү, ыалдьыттары көрсүү – үлэ элбэх буоллаҕа. Онуоха оҕолор барахсаттар ийэлэрин көрсөөрү, гостиницаҕа кэлэн хонсоллор эбит.
Саҥа атаҕар туран эрэр предпринимательгэ кумааҕы үлэтэ да аҕыйаҕа суох. Нолуоктар, бухгалтерия, араас бэрэбиэркэлиир уорганнартан көҥүл ылыы – сүүрүү-көтүү элбэх. Онуоха урут ОДьКХ эйгэтигэр бухгалтерынан үлэлээбит буолан, ол улаханнык туһалаабыт. Аны оҕолоругар, кэргэнигэр болҕомто ууруон эмиэ наада буоллаҕа. Оттон үлэһит ыларыгар ыарахаттары көрсүбүт – бэйэтин курдук ыраас, түргэн туттунуулаах, эппиэтинэстээх, эйэҕэс кыыһы көрдөөбүт. Үлэһит эрдэ турар, хойут утуйар, ону тэҥэ, бэрээдэги тутар. Онон хас да кыыс кэлэн боруобаланан көрөн баран, уурайбыттар. Билигин бастайааннай үлэһитин булан, Алдана көмөлөһөөччүтүгэр үлэ киниискэтин арыйда, соцбакыатын төлүүр.
- Инникитин атахпар турдахпына, гостиницабын өссө тупсарыам. Хостору анаан дизайнныахпын баҕарабын, оччоҕо ордук тупсаҕай көстүүлээх буолуо этилэр. Ыалдьыттарым дьиэлэригэр курдук сылдьан, сынньанан барыахтарын баҕарабын. Билиҥҥитэ командировкаҕа кэлэн баран, нэдиэлэни быһа олорооччулар бааллар, омуктар да кэлэн түһэллэр. Онон хостор кураанах турбаттар.
Ангелина ВАСИЛЬЕВА