РФ Президенэ Владимир Путин Оҕо дьиэлэриттэн кырачааннары дьиэҕэ иитэ ылбыт ыалларга улахан болҕомтону уурарга сорудахтаата.
Оҕону дьиэҕэ иитэ ылыы В.Путин сорудаҕынан 2012 сылтан элбээн барбыта. Ити сыл дьиэ кэргэҥҥэ бэриллибит оҕолор ахсааннара 119 тыһыынча эбит буоллаҕына, билигин 51 тыһыынчаттан таҕыста.
«Оҕолору дьиэлэригэр иитэ ылааччылары өйүөххэ, кинилэргэ ураты кыһамньыны ууруохха. Онуоха регионнары кытары үлэлээҥ», – диэн аҕа баһылык РФ вице-премьерэ Ольга Голодецка сорудах биэрдэ.
Манна эбэн эттэххэ, Арассыыйа Президенэ РФ аҕыйах ахсааннаах төрүт норуоттар уонна көс олохтоох омуктар оҕону иитэ ылалларыгар тахсар мэһэйдэри чэпчэтэр сокуоҥҥа илии баттаата. Урут чуумнар уонна ураһалар олорор дьиэ быһыытынан докумуоҥҥа киирбэт буоланнар, кинилэр оҕо иитэ ылалларын көҥүллээбэттэрэ.
Бу сокуон Оҕо дьиэлэригэр иитиллэ сылдьар аҕыйах ахсааннаах төрүт норуоттар оҕолоро үөрэммит эйгэлэригэр төннөллөрүгэр, омук быһыытынан олохторун укулаатын уларыппаттарыгар туһалаах буолуоҕа.
Надежда ЕГОРОВА, «Саха сирэ» хаһыат, edersaas.ru