Самаан сайын кэлэрэ чугаһаата. Сайын буолуута, от-мас көҕөрөр кэмигэр Федеральнай ойуур хаһаайыстыбатын агентствота дойду үрдүнэн “Бүтүн Россиятааҕы маһы олордуу” экологическай аахсыйаны сылын аайы тэрийэрэ үтүө үгэскэ кубулуйда.
Александр ТАРАСОВ, «Саха сирэ» хаһыат, https://edersaas.ru
Россия бары регионнарыгар, куораттарыгар уонна нэһилиэнньэлээх пууннарыгар маһы олордууга киэҥ далааһыннаах субуотунньуктар ыытыллаллар. Быйыл бу тэрээһинтэн Саха сирин ойуурун тустаах үлэһиттэрэ ойуччу туран хаалар санаалара суох. Россия үрдүнэн Экология сылын чэрчитинэн, СӨ ойуур сыһыаннаһыыларыгар департамена быйылгы анал аахсыйаны өссө киэҥ далааһыннаахтык ыытары былааннаата.
Манна аҥаардас маһы олордон, тыаны чөлүгэр түһэрии эрэ буолбакка, нэһилиэнньэни, ордук эдэр ыччаты экологическай сыаннастарга үөрэтии уонна тыаҕа, айылҕаҕа хайдах дьаһанан сылдьарга такайыы буолар.
Быйыл Саха сиригэр маһы олордуу ыам ыйын ортотуттан саҕаланан ый бүтүөр диэри барыаҕа. Оттон ыам ыйын 20 күнүгэр, Ньукуолун буолуон икки күн иннинэ, “Бүтүн Россиятааҕы маһы олордуу” аахсыйата дойду үрдүнэн ыытыллыаҕа. Бу күн Россия бары олохтоохторо бары күргүөмүнэн тахсан мас олордуохтара. Итини тэҥэ, оскуола үөрэнээччилэригэр, оҕо саадтарын иитиллээччилэригэр айылҕаны харыстааһыҥҥы аналлаах кылаас чаастара, лиэксийэлэр, араас куонкурустар, быыстапкалар ыытыллыахтара. Бу тэрээһиннэргэ ойуур хаһаайыстыбатын үлэһиттэрэ, исписэлиистэрэ кыттыахтара.
Түгэнинэн туһанан, СӨ Ойуур сыһыаннаһыыга департамена бу ураты суолталаах, көдьүүстээх тэрээһиҥҥэ өрөспүүбүлүкэ ытык-мааны дьонун-сэргэтин көхтөөхтүк кыттаргытыгар ыҥырар!
