Горнай улууһугар Күөрэлээххэ тырахтарыыстар күрэхтэһиилэрэ болҕомтону тарта.
Тырахтарыыстар эрдэттэн ох курдук оҥостубут, бэлэмнэммит күрэхтэһиилэрэ сарсыардаттар өрө көтөҕүллүүлээхтик саҕаланна. Күрэхтэһээччилэри, үөрүүнү үллэстэ, күөн күрэһи көрө мустубут дьону-сэргэни улуус баһылыга Н.В.Андреев, улуустааҕы аҕалар түмсүүлэрин салайар, успуорт киинин мэтэдииһэ А.А.Александров эҕэрдэлээтилэр.
Аһыматтан уонна Бэс Күөлтэн уопсайа аҕыс тырахтарыыс үлэлэригэр сатабылларын көрдөрдүлэр, билиилэрин-көрүүлэрин кытары тургутустулар. Уопсайа түөрт түһүмэххэ бары да эрбии тииһин курдук эгил-тэгил эристилэр. Ол түмүгэр, эриирдээх ыйытыылардаах викторинаҕа 1 миэстэни Михаил Максимов ылла. Иккис миэстэҕэ Федот Семенов, үһүскэ Степан Коров таҕыстылар. МТЗ-82 тыраахтары ыытыы сатабылыгар 1 м. Михаил Максимов буолла. Иккиһи Василий Жирков, үсүһү Афанасий Владимиров ылан үөрдүлэр-көттүлэр. Тыраахтарга стоговоһу, сыарҕаны холбонуу түһүмэҕэр 1 м. Михаил Максимов, 2 м. Василий Жирков, 3 м. Сидор Сидоров. Погрузчиктаах тыраахтарынан үлэҕэ 1 м. Афанасий Владимиров таҕыста. 2 м. Александр Федоров, 3 м. Сидор Сидоров тигистилэр. Күүрээннээх күрэхтэһии болҕомтону тардыан тарта.
Уоттаах-күөстээх күрэс түһүмэхтэринэн уопсай түмүккэ 227 очукуону хомуйбут Михаил Максимов (Күөрэлээх) биэтэккэ эрэллээхтик бастаан таҕыста. Иккиһи 191 очукуолаах Афанасий Владимиров (Күөрэлээх) ылла. Үһүс бириистээх миэстэҕэ Василий Жирков (189 очукуо, Күөрэлээх) таҕыста. Дьон-сэргэ бэртээхэй күрэстэн, уолаттар үлэни кыайа-хото туталларыттан улаханнык астыннылар.
Кыайыылаахтарга уонна күрэхтэһиигэ кыттыбыттарга улуус баһылыга Н.Андреев, олохтоох дьаһалтаттан Г.Алексеев, улуустааҕы аҕалар түмсүүлэрин салайар А.Александров, улуус уонна нэһилиэк тэрилтэлэрэ, «Стройэксперт» ХЭУо (дириэктэр А.Дьячковскай), «Аурис» ХЭУо (сал. А.Колочев), «Сомоҕо» ХЭУо (дир.Д.Петров), успуорт уонна физкултуура киинэ (дир.О.Михайлов), «Эгопласт» ХЭУо (дир. М.Соловьев), «Горнай-Ас» ТХППК (дир.Н.Ефремов), «Руслан» маҕаһыын (дир.Р.Федотов), «Махтал» маҕаһыын (сал.Т.Афанасьев), «Прогресс» маҕаһыын (сал.А.Васильев), «Байдам» маҕаһыын (А.Оленова), И.Иванов, В.Тимофеев, А.Колочев, И.Аввакумов, Н.Попов оҕолоро, КФХ К.Оленов, Октябрьскай нэһилиэгин бааһынай хаһаайыстыбалара уо.д.а. туруорбут бириистэрэ үөрүүлээх быһыыга-майгыга, дохсун ытыс тыаһыгар доҕуһуоллатан туттарылыннылар.
Хаартыскалар уонна видео «Үлэ күүһэ» хаһыат.