“Үөрэххэ ураты кыһалҕалаах устудьуоннар, аспираннар уонна исписэлиистэр өрөспүүбүлүкэтээҕи ассоциациялара» уопсастыбаннай тэрилтэ (ОО «ЯРАСАС») быйыл тэриллибитэ 25 сылын бэлиэтиир.
Надежда ЕГОРОВА, «Саха сирэ» хаһыат, edersaas.ru
Бу сыллар устата ассоциация үөрэххэ ураты кыһалҕалаах дьон, ол иһигэр көрөллөрө мөлтөхтөр, ыраахтан үөрэнэллэригэр улахан уопсастыбаннай үлэни тиһигини быспакка ыытта.
«Биһиги араас граннары ыларга бырайыагынан үлэлэри күүскэ ыытабыт. Быйыл «Хомуска оонньуурга үөрэн» диэн Брайл систиэмэтинэн ааҕыллар үөрэтэр пособиены бэлэмнииргэ уонна бэчээттииргэ «Билии – Күүс» бырайыагы оҥордубут. Ол курдук, биллиилээх виртуоз-хомусчут Спиридон Шишигин «Хомуска тарда үөрэниҥ» кинигэтэ таҕыста. Хас биирдии пособие сахалыы, нууччалыы уонна немецтии тылынан суруллубут кинигэттэн турар.
Бу бырыайыакпытынан Грант ылары ситистибит. Онно олоҕуран, Дьокуускай куорат дьаһалтатын кытары сөбүлэһии түһэристибит. Сөбүлэһии быһыытынан, уопсастыбаннай суолталаах бырайыактары өйүүргэ куорат уокуругун бюджетыттан үп көрүллэр.
Маннык туһалаах кинигэни таһаарарбытыгар көмөлөспүт Дьокуускай куорат дьаһалтатыгар, куорат баһылыга Айсен Николаевка, уокуруктааҕы дьаһалтаны кытары сибээскэ отдел үлэһиттэригэр махталбытын биллэрэбит», – диэн ассоциация бэрэссэдэтээлэ Пантелеймон Егоров махталын тириэрдэр.
Надежда ЕГОРОВА, «Саха сирэ» хаһыат, edersaas.ru
ВИДЕО: