Ахсынньы 2 күнүгэр Саха сирин хирурдара өссө биир сүҥкэн эпэрээссийэни оҥордулар. Харах өрөспүүбүлүкэтээҕи балыыһатыгар офтальмолог-хирурдар кыайан көрбөт икки ыарыһахха атын киһиттэн (донортан) ылан, харах дьэҥкир бүрүөтүн (роговица) уларыттылар.
СӨ Доруобуйа харыстабылын министиэристибэтэ иһитиннэрбитинэн, эпэрээссийэ оҥорторбут ыарыһахтар туруктара үчүгэй. Билигин стандарт быһыытынан эмтэнэ сылдьаллар.
«Харах дьэҥкир бүрүөтүн Москва к. харах донорын баанкатыттан ыллыбыт. Эпэрээссийэлэммит ыарыһахтар араас ыарыы содулуттан харахтарын бүрүөһүнэ өлбөөрөн, көрбөт кэриэтэ этилэр. Саҥа дьэҥкир бүрүөһүнү олордуу кэнниттэн тулалыыр эйгэлэрин көрөр буолуохтара», – диэн харах өрөспүүбүлүкэтээҕи балыыһатын хирургияҕа отделениетын сэбиэдиссэйэ Екатерина Захарова кэпсээтэ.
Харах өрөспүүбүлүкэтээҕи балыыһата үрдүк технологиялаах аппараттарынан уонна аныгы препараттарынан толору хааччыллыылаах. Исписэлиистэр тиһигин быспакка идэлэрин үрдэтэллэр, саҥаны билэллэр. Онон үрдүк категориялаах эмчиттэр маннык эпэрээссийэ тиэхиникэтин бары баһылаатылар.
«Биһиги сылга 6000 тиийэ үрдүк технологиялаах эпэрээссийэни оҥоробут. РФ бырабыыталыстабын, СӨ Ил Дарханын өйөбүллэринэн үрдүк технологиялаах медицинскэй көмө күүһүрдэр күүһүрэн иһэр. Ону Саха сиригэр доруобуйа харыстабылын сайдыытын стратегиятын дьоһун суолталаах хайысхатынан сыаналыыбыт», – диэн СӨ доруобуйа харыстабылын миниистирин бастакы солбуйааччы Олег Припузов иһитиннэрдэ.
Надежда ЕГОРОВА