«Харахпынан инбэлииппин. Былырыын «Өрөспүүбүлүкэ» киинэ-тыйаатырыгар («Сахафильм») «Кэрэл» киинэни көрөн-истэн наһаа да дуоһуйбутум. Тиффло-быһаарыылаах киинэни оҥорор буолуохтарыттан, биһиги даҕаны киинэ көрөр кыахтанныбыт», – диэн Жатайдааҕы техникум устудьуонката Марианна Рожина кэпсиир.
edersaas.ru
Тохсунньу 18 күнүгэр көрбөттөр өрөспүүбүлүкэтээҕи библиотекаларыгар харахтарынан мөлтөхтүк көрөр уонна инбэлиит дьон 1 чаас 25 мүнүүтэ уһуннаах «Жили-Были» диэн киинэни көрдүлэр. Киинэ тиффло-быһаарыылаах. Ол аата киинэ былаһын тухары артыыстар тугу кэтэ сылдьалларын, тугу гыммыттарын, ханнык дьиэҕэ кэлбиттэрин, уопсайынан барытын сиһилии кэпсээн биэрэллэр. Ону истэ олороҥҥун, хараххар оҥорон, уруһуйдаан көрөҕүн.
Иван Павлов тиффло-быһаарыылаах «Василиса» диэн киинэни урут эмиэ көрбүт эбит. «Мин харахпынан олох көрбөппүн. Былырыын «Синема» киинэ-тыйаатырыгар сылдьыбытым. Онон, бу сырыыга эмиэ үөрэ-көтө кэллим. Анал киинэлэри элбэхтик оҥороллоро эбитэ буоллар диэн баҕа санаалаахпын», – диэн этэн туран, үтүө дьыаланы оҥоро сылдьар «Мегафон» хампаанньаҕа махталын тириэртэ.
Харахтарынан мөлтөхтүк көрөр уонна инбэлиит дьон саҥа тахсыбыт киинэлэри көрүөхтэрин, сонун кинигэлэри ааҕыахтарын аһара баҕараллар. «Мегафон» хампаанньа «Чемпионы», «Белка и стрелка» уонна «Поддубный» диэн киинэлэри субтитрдаан уонна тиффло-быһаарыылаан оҥотторон, анал коррекционнай оскуолаҕа уонна өрөспүүбүлүкэтээҕи көрбөттөр библиотекаларыгар бэлэхтээбитэ.
Хампаанньа бэрэстэбиитэлэ Анатолий Трофимов «Кино для незрячих и глухих» диэн социальнай бырайыактарынан салгыы даҕаны үлэлэтэр былааннаахтарын кэпсээтэ. Библиотекаҕа мустубут дьоҥҥо хампаанньа аатыттан МП-плеердары туттартаата.
Анивера АКИМОВА, edersaas.ru