Булуҥ оройуонугар ыраах олорор дьон, бастакынан табаһыттар, Арассыыйа Төрүт сокуонугар уларытыылары киллэриигэ болдьоҕун иннинэ куоластааһыҥҥа кытыннылар.
Болдьоҕун иннинэ куоластааһын сылдьарга эрэйдээх уонна ыраах баар оройуоннарга, полярнай уонна күнү-дьылы кэтиир ыстаансыйаларга, бэс ыйын 16 күнүттэн ыытыллар. Бу туһунан Улуус.медиаҕа Ульяна Попова суруйар.
Булуҥ оройуонугар 9 №-дээх уонна «Булунское» 5 №-дээх МУТ ыстаадатын табаһыттара куоластаатылар. 70 №-дээх быыбардыыр учаастактааҕы хамыыһыйа чилиэннэрэ бөртөлүөтүнэн быыбардыыр сиргэ бэс ыйын 17 күнүгэр тиийбиттэр. Быыбардыыр хамыыһыйа 16 киһи номнуо куоластаабытын иһитиннэрэр.
70 №-дээх учаастактааҕы быыбардыыр хамыыһыйа сэкирэтээрэ Анастасия Попова, бэс ыйын 17 күнүгэр, 16 табаһыт болдьоҕун иннинэ куоластаабытын, «Табаһыттар 9 №-дээх ыстаадаларыгар — 8 , 5 №-дээх ыстаадаҕа эмиэ 8 киһи куоластаабытын этэр. Биһиги тиийиибитигэр, сорох табаһыттар ыстаадаларын көрө барбыт этилэр. Салгыы «Булунское» 3 №-дээх МУТ ыстаадатыгар биэс киһи куоластаары күүтэринэн, бүгүн, бэс ыйын 18 күнүгэр, онно тиийиэхтээхпит.
Табаһыттар 9 №-дээх ыстаадаларын биригэдьиирэ Владислав Винокуров: «Мин вируһу кытары сибээстээх туох эрэ буоллаҕа дии санаабытым, Арассыыйа Төрүт сокуонугар уларытыылары киллэриинэн сибээстээн эбит. Дойдуга туох буола турарын биһиги манна хойутуу истэбит, билэбит. Учаастактааҕы хамыыһыйа кэлбитэ үчүгэй. Хаһыаттары түҥэттилэр уонна дойду Төрүт сокуонугар уларытыылар тустарынан быһаарыылаах листовкалары биэрдилэр. Ону билсэн баран куоластаатыбыт. Дьаҥтан харыстаан мааскалары уонна бэрчээккилэри биэрбиттэрэ. Бүгүн оруобуна миэстэбитин уларытаары сылдьыбыппыт, хата, кэмигэр кэллигит. Биһиги наар айанныы, көһө сылдьар дьон буоллахпыт. Чууммутун туруорабыт, ылабыт. Арыт күҥҥэ 30-туу килэмиэтири айанныыбыт. Табаларбытын көрөн-истэн, мэччитэн олордохпут», — диэбит.
Улус.медиа, Ульяна Попова, ааптар хаартыскаларга түһэриитэ.
Sakhaday.ru