«Көр, бу Арассыыйа!» куонкуруска кыттарга онлайн-регистрация саҕаланна
Бүтүн Арассыыйатааҕы «Көр, бу Арассыыйа!» диэн видеоаккырыыккалары атастаһыы куонкуруһунун тэрийэр кэмитиэтэ балаҕан ыйын 15 күнүттэн бырайыакка кыттарга онлайн-регистрация саҕаланарын биллэрдэ.
edersaas.ru б
Бу кэмитиэккэ Саха Өрөспүүбүлүкэтин Бырабыыталыстыбатын, Арассыыйа үөрэхтээһиҥҥэ, ыччакка уонна туризмҥа министиэристибэлэрин итиэннэ «Арассыыйа – кыахтар дойдулара» платформа бэрэстэбиитэллэрэ киирэллэр. Култуура министиэристибэтэ бырайыагы эмиэ өйүүр. Быйылгы куонкуруска кыттааччылар биэстии киһилээх хамаанданан киирсэллэр итиэннэ бэйэлэрин эрэгийиэннэрин номохторунан видеороликтары бэлэмнииллэр. Айбыт видеоаккырыыккаларын хамаандалар хардарыта атастаһаллар. Куонкурус түмүгэр аһаҕас куоластааһынынан кыттааччылары саастарынан арааран, үс бөлөҕүнэн кыайыылаахтар быһаарыллаллар: 6-10, 11-15 уонна 16-18 саастаахтарга. Кыайыылаахтар смартфоннарынан наҕараадаланыахтара. Бырайыак быраабылатын быһыытынан, сайаапканы Арассыыйа оскуолаларын үөрэнээччилэрэ, ким баҕалаах барыта ыытыан сөп. Онуоха хамаанданы сааһын сиппит кураатар эрэ регистрациялатар. Регистрация балаҕан ыйын 15 күнүттэн сэтинньи 1 күнүгэр диэри ыытыллар. Быраабыла толору испииһэгин уонна регистрация форматын куонкурус официальнай сайтыгар көрүҥ: https://lookitsrussia.ru/registratsiya/.
Бүтүн Арассыыйатааҕы «Көр, бу Арассыыйа!» диэн видеоаккырыыккалары атастаһыы куонкуруһа былырыын Саха Өрөспүүбүлүкэтин Ил Дархана Айсен Николаев өйөбүлүнэн саҕаламмыта. Бары эрэгийиэннэртэн 17 500 оҕо кыттыбыта, куоластааһыҥҥа 200 000 киһи кыттыбыта. Иккис куонкурус саҕаланарын туһунан Уһук Илиҥҥи экэниэмикэ форумугар ыччат бырагырааматын чэрчитинэн, балаҕан ыйын 4 күнүгэр иһитиннэриллибитэ. Ким кэрэхсээбит куонкурус сайтыттан https://lookitsrussia.ru уонна телеграм-каналтан @smotrirussia эбии сонуннары көрүөн сөп диэн өрөспүүбүлүкэ официальнай информационнай сайта иһитиннэрэр.
Раиса Сибирякова, «Саха сирэ» хаһыат, edersaas.ru б