Көннөрөр кииннэр Ленскэйгэ, Үөһээ Бэстээххэ уонна Дьокуускайга арыллыахтара
Саҥа үүммүт 2017 сыл тохсунньу ыйын 1 күнүттэн накаастабыл саҥа көрүҥэ — кыһалаҥ үлэҕэ ууруу — дойду үрдүнэн олоххо киирбитин туһунан суруйан турабыт.
Вера МАКАРОВА, «Саха сирэ», edersaas.ru
Санатар буоллахха, быйылгыттан маннык миэрэ кыра уонна орто буруйу итиэннэ ыар буруйу аан бастакытын оҥорбут дьоҥҥо туттуллуохтаах — 2 ыйтан 5 сылга диэри көҥүлү быһыы оннугар. Маныаха сууттаммыт киһиэхэ кэккэ хааччахтар син биир бааллар: үлэни бэйэтэ булара бобуллар, дьаһалта көҥүлэ суох үлэтиттэн уурайар уонна көннөрөр киинтэн тахсан барар бырааба суох.
Эрдэ иһитиннэрбиппит курдук, маннык миэрэнэн сууттаммыт дьон анал көннөрөр кииҥҥэ, уопсай дьиэлэргэ буруйун боруостуоҕа. Бастакы түөрт киин номнуо аһыллан, тохсунньу 1 күнүттэн кыһалаҥ үлэҕэ ууруллубут 900 хаайыылааҕы ыларга бэлэм, ол — Ставропольскай уонна Приморскай кыраайдарга, Тамбовскай уонна Тюменскай уобаластарга. Уонна сотору кэминэн дойду бары регионугар баар буолуохтаахтар.
Оттон биһиги өрөспүүбүлүкэбитигэр итинник киин быйыл аһыллыахтаах. Ол тула ырытыһыы РФ Накаастабылы толорор федеральнай сулууспатын Саха сиринээҕи управлениетыгар буолла. Манна управление начальнига Владислав Дзюба, СӨ Үрдүкү суутун бэрэссэдээтэлин солбуйааччы Любовь Летучих, өрөспүүбүлүкэ борокуруорун старшай көмөлөһөөччүтэ Тимур Никифоров уонна холуобунай-исполнительнай инспекция начальнига Татьяна Протодьяконова кытыннылар.
Бу мунньахха барыллаан быһаарбыттарынан, Көннөрөр кииннэр Дьокуускайга баар 2 №-дээх көс-холуонньаҕа, Ленскэйдээҕи 8 №-дээх ураты режимнээх уонна Үөһээ Бэстээхтээҕи 3 №-дээх уопсай режимнээх холуонньаларга арыллаллара былааннанар. Итинэн сибээстээн, ити улуустар баһылыктарыгар суруктары бэлэмнээн ыыттылар — кыһалаҥ үлэҕэ ууруллубут буруйдаахтарга үлэ миэстэтин хааччыйарга миэрэ ылалларыгар.
Вера МАКАРОВА, «Саха сирэ», edersaas.ru
Хаартыскалар: УФСИН пресс-сулууспата.