Мин оҕом Кэрэчээнэ Борисова Дьокуускай куораттааҕы национальнай гимназия “Сэргэлээх” диэн салаатын маҥнайгы кылааһыгар үөрэнэр.
edersaas.ru
Үөрэх сыла саҕаланыаҕыттан кинилэр кылааһынан Маргарита уонна Александр Герасимовтар оҥорбут “Күннүктэринэн” күнү-дьылы кэтээн көрөллөр. Кэрэчээнэ “Күннүккэ” бэлиэтээһини бастаан биһигини, төрөппүттэрин, көмөлөһүннэрэн оҥороро, Саҥа дьыл кэнниттэн барытын бэйэтэ толорор буолла. Маҥнай ыарырҕатар этэ.
— Ийээ, минус суох дии, хайдах суруйабын? — диэн биирдэ ыйыппытыгар, мин кыһыл сурааһынтан үөһэ тахсарын быһааран биэрбитим. Онон, холобур бүгүн халлаан 29 кыраадыс тымныы буоллаҕына, кыһыл сурааһынтан 25-һи булар уонна түөрт сурааһыны эбэр, оччотугар “-29” буолар, инньэ гынан “Күннүгү” толоро таарыйа Кэрэчээнэ сүүрбэттэн үөһэ сыыппаралары эбэргэ үөрэннэ. Соҕуруулуу-арҕааттан тыаллаах күн үүннэҕинэ, “Күннүк” “Болдьохтоох бэлиэлэр” диэн балаһатыгар тыал хайысхалара хайдах ыйылла сылдьалларын булан бэлиэтиир. Онтон былыты барыбытыттан уочаратынан ыйытар, бэйэтэ эмиэ кэтиир. Билигин бииргэ үөрэнэр оҕолоруттан:
— “Күннүгү” бэйэҕит толороҕут дуо? — диэн ыйытар итиэннэ мин ийэбин сынньатан, бэйэм толоробун диир үһү.
Кылааһын салайааччытыгар Валентина Семеновнаҕа сороҕун сыыһа толордум диир, бэйэтигэр бэрт кытаанах ирдэбиллээх эбит. Онон инникитин күн-дьыл туругун болҕомтолоохтук кэтээн, “Күннүгүн”өссө үчүгэйдик, ыраастык толоруо. Оҕом бу “Күннүгү” кытары доҕордоһон, кинини аргыс оҥостон, элбэҕи биллэ-сатаата, үгүскэ, ол иһигэр айылҕаны кэтээн көрөргө, үөрэннэ. Ити иһин биһиги дьиэ кэргэн ааптардарга махталбытын этэбит.
Марфа БОРИСОВА, «Саха сирэ» хаһыат, edersaas.ru саайтка анаан
