Быйыл Сунтаар Күндэйэтигэр 16 ыал саҥа дьиэҕэ киирэр. 2009 сылтан тыа хаһаайыстыбатын субсидиятын көмөтүнэн номнуо 28 эдэр дьон туһанна. Онтон иккитэ — Елисеевтар уонна Еремеевтар саҥа дьиэҕэ киирээри үлэ үгэнигэр сылдьаллар.
Мария Кобельянова, edersaas.ru
Олохтоох дьаһалта нэһилиэги сайыннарар, тупсарар туһуттан бэртээхэй бырайыактаах. Ол курдук эргэ, быраҕыллыбыт дьиэлээх уһаайбалары докумуоннаан, эдэр ыалларга биэрэр. Санатан эттэххэ, аҕыйах сыллааҕыта «Олбуор» диэн тосхолунан киин уулуссалар олбуордарын саҥардыбыттара. Онон, Күндэйэ тупсар, сайдар, ыаллар куоталаһа-куоталаһа саҥа дьиэлэнэллэр.
Күндэйэҕэ «Сырдык аартык» ТХПК күннэтэ сайдар. Салайааччы Розалия Иванова — сатабыллаах салайыытынан, бэйэлэрин үптэринэн бу сайын икки этээстээх офис туттан киирэн эрэллэр.
Тутууну Леонид Саввинов салайааччылаах олохтоох биригээдэ тутта. Хонтуора бастакы этээһэ маҕаһыын буолуоҕа. ТХПК бородууксуйата мин билэрбинэн Сунтаарга уонна Уустуйаҕа атыыланар. Икки улахан хотонугар быйыл 240 төбө кыстыаҕа. Билигин 40-тан тахса тарбыйах көрүүгэ-истиигэ сылдьаллар.
Маны таһынан, быйыл республика сайылыктааһын тосхолугар киирсэн, улууска үс сайылыкка үп көрүллүбүт буоллаҕына, «Сырдык аартык» алта сайылыгыттан саамай элбэх 107 ыанар ынахтаах Ньээкэ сайылыгар 2 мөл. 990 тыһ.солк. көрүллэн саҥардыллан эрэр.
Бу сайын саҥа титиик уонна үүт тутар дьиэтэ оҥоһуллубут. Аны ынах ыыр ыстаансыйа кэлэн туруохтаах, саҥа күрүөлэниэхтээх уонна икки олорор дьиэ тутуллуохтаах. Эһиил улахан 120 миэстэлээх механизированнай хотон туттар былааннаахтар.
Салгыы тыа хаһаайыстыбатын исписэлииһин Егор Максимовы кытта кэпсэттим, быйыл күрүөлээһин тосхолунан 22 км былааннаммыт, Ынах Маара бүтэн, аны Улахан Күөлгэ номнуо 8 км күрүөлэнэн бүппүт. Манна эмиэ олохтоох уолаттар үлэлии сылдьаллар.
Күндэйэ туһунан сиһилии устуулары @_tuscu_keskilleex_sonunnara инстаграмм страницатыгар киирэн көрүҥ!
Мария Кобельянова, edersaas.ru