Бу күннэргэ социальнай ситимнэринэн кыбытык тигиилээх панно хаартыската тарҕанна. Дьонтон ыйыталаһан билбиппит, Сунтаар улууһун Күндэйэ иистэнньэҥнэрин үлэлэрэ эбит. kundya_news суруйарынан, «ИЛ» култуура киинин иһинэн үлэлиир «Иис алыба» куруһуок ханна да хатыламмат кэрэ оҥоһугун бу кыһын дьон-сэргэ дьүүлүгэр таһаарбыт.
«Саха норуотун биир чаҕылхай, сүдү талааннаах норуодунай худуоһунньуга, Күндэйэ сириттэн төрүттээх Тимофей Андреевич Степанов эргэ кулууп фойетыгар биир хартыынаны уруһуйдаан хаалларбыта. Кулуупка сылдьыбыт эрэ кэрэхсээн көрөр сүдү хартыына билигин нэһилиэкпит түмэл-балаҕаныгар турар. Бу хартыынаны «тилиннэрэн» Августина Ивановна Евсеева салайааччылаах «Иис алыба» куруһуок иистэнньэҥнэрэ паннону 2019 сыл олунньутуттан тигэн саҕалаабыттара. Панно хас биирдии ойуутун сукуна матырыйаалга түһэрэн, өҥүн дьүөрэлээн, кыбытык тигии ньыматынан оҥорбуттар. Бу панно 3 миэтэрэттэн тахса уһуннаах, 1,5 миэтэрэ үрдүктээх«, — диэн kundya_news инстаграм сирэйигэр суруйбуттар.
Хаартыска батсааптан.
edersaas.ru