Ырыаҕа ылламмыт, хоһооҥҥо хоһуллубут Күөх Ньурба улууһун Күндээдэ нэһилиэгэр от ыйын 1-2 күннэригэр «Күндээдэ» сопхуос төрүттэммитэ 35 сылын бэлиэтээһин чэрчитинэн, массыынанан ыаһын оператордарын XXII өрөспүүбүлүкэтээҕи күрэхтэһиитэ итиэннэ үп-харчы өттүнэн чэбдигирдии бырагырааматынан үлэлиир хаһаайыстыбалар буҕаалтырдарын сэминээрэ буолан ааста.
edersaas.ru
Күннээн үлэлээбит кэмигэр 2246 ынах сүөһүлээх, ол иһигэр 765 ыанар ынахтаах, 223 үлэһиттээх “Күндээдэ” сопхуоска И.В.Николаев, А.В.Долгунов, А.Н.Николаев, Н.И.Андреев уо.д.а. дьиҥ чахчы дьон туһугар долгуйар салайааччылар үлэлээн-хамсаан ааспыттара. Сойуус ыһыллар кэмигэр сопхуос кыра хаһаайыстыбаларга, чааһынайдарга тарҕанан хаалбакка, агрофирма буолан салгыы үлэлээбитэ. Билигин аахсыйаламмыт уопсастыба быһыытынан үлэлиир. Күн бүгүн генеральнай дириэктэр Александр Алексеев салалтатынан үлэлиир хаһаайыстыба 714 ынах сүөһүлээх, ол иһигэр 240 ыанар ынахтаах, 340 сылгылаах, ол иһигэр 172 биэлээх, 662 туонна үүтү туттарар, 980 туонна оту оттуур былааннаах биир бөдөҥ хаһаайыстыба буолар.
Ыанньык сүөһүтүн икки сайылыгынан таһааран олорор. Олортон биирдэстэригэр, саҥа үлэҕэ киллэриллибит, толору хааччыллыылаах Кириэс сайылыгар, массыынанан ыаһын оператордарын XXII өрөспүүбүлүкэтээҕи күрэхтэһиитэ буолла. Онно 15 улуустан уон аҕыс хамаанда, барыта 72 ыанньыксыт, 35 сааһыгар диэри уонна 35-тэн үөһэ саастаахтарга арахсан, биирдиилээн итиэннэ хамаанданан күөн көрүстүлэр.Күрэхтэһии аһыллыытыгар хамаандалар параадтаан киирбиттэрин кэнниттэн, күрэхтэһии кыттыылахтарын тыа хаһаайыстыбатын миниистирэ Александр Атласов, Ньурба улууһун баһылыга Алексей Иннокентьев эҕэрдэлээтилэр. Биллиилээх ыанньыксыттар – Үлэ Дьоруойа Михаил Готовцев уонна «Үлэ Албан аата» уордьан толору кавалера Владимир Михайлов күрэхтэһии былааҕын күөрэччи көтөхтүлэр.
Күрэхтэһии үс түһүмэҕинэн ыытылынна. Ол курдук, ыанньыксыттар сарсыарда ынаҕы аппараатынан ыырга күрэхтэстилэр. Онуоха үгэс курдук, аппараатынан ыан баран, илиилэринэн сыппайар буоллахтарына, бу сырыыга сыппайыыны аппараатынан оҥорор ирдэбил турда.Теория өттүнэн билиини тургутуу түһүмэҕэр анал тургутуктары толордулар, ыанар ынах анатомиятыгар, физиологиятыгар итиэннэ көрүү-истии, аһатыы-сиэтии уратыларыгар сыһыаннаах ыйытыыларга хоруйдаатылар. Салгыы ыыр аппарааты ыһан хомуйууга күрэхтэстилэр.
Түмүккэ эдэрдэргэ Хаҥалас улууһун хамаандата хотто, биирдиилээн киирсиигэ Мария Саввина (Хаҥалас) бастакы, Елизавета Степанова (Бүлүү, Кыргыдай) иккис, Лилияна Анисимова (Амма) үһүс миэстэлэри ыллылар.
35-тэн үөһэ саастаахтарга “Өлүөхүмэ кыладабыайа” ХЭТ хамаандата тэҥнээҕин булбата, биирдиилээн киирсиигэ Людмила Нутчина (Өлүөхүмэ) хотто, Елизавета Никифорова (Сунтаар) иккис, Александр Громов (Хаҥалас) үһүс буоллулар. Онон, дьүүллүүр сүбэ быһаарыытынан, Людмила Нутчина бу ый ортотугар Уфаҕа ыытыллар массыынанан ыаһын оператордарын Бүтүн Арассыыйатааҕы күрэхтэһиилэригэр өрөспүүбүлүкэ аатын көмүскүү барар буолла!
Бастакы миэстэни ылбыт ыанньыксыкка генератор, иккис миэстэни ылбыкка «Минскэй» матассыыкыл, үһүс миэстэҕэ ыыр аппараат, бастаабыт хамаандаҕа “Ньурба” улууһун дьаһалтата туруорбут “УАЗ-фермер” массыыната туттарылынна. Маны таһынан бэйэлэрин анал бириистэрин Үлэ Дьоруойа Михаил Готовцев эдэр фермер Петр Кардашевскайга (Үөһээ Бүлүү, Балаҕаннаах), Владимир Михайов «Үлэ Албан аата» уордьан толору кавалера ыанньыксыт Елизавета Степановаҕа (Бүлүү, Кыргыдай) туттардылар.
Екатерина Захарова, «Саха сирэ» хаһыат, edersaas.ru анаан