Өксөкүлээх Өлөксөй аатынан норуоттар доҕордоһууларын дьиэтигэр «Күн табата» далааһыннаах тэрээһин кыттыылаахтарын кытары көрсүһүү буолла.
Зинаида Таханова (Алтай) өбүгэлэрин олоҕун-дьаһаҕын кэпсиир, көрдөрөр, билиһиннэрэр таба тириититтэн тигиллибит хараҕы сымнатар, дууһаны манньытар таҥастары көрдөрө, сыаналата аҕалбыттарын эттэ. Онтон Казахстантан кэлбит Райхана Бакирова быйыл аныгылыы моһуоннаах таҥастарынан кыттар соруктаахтарын иһитиннэрдэ. Кини: «Саха сиригэр бастакы кэлиим. Түгэҕэ биллибэт маҕан хаарынан бүрүллүбүт Саха сирэ остуоруйа дойдутун санатта. Маннык кэрэ сиргэ түмсэммит национальнай таҥаспыт-саппыт арааһын көрдөрөрбүт, санаабытын үллэстэрбит, үлэбитигэр үөрүйэҕи атастаһарбыт олус үчүгэй. Ордук ыччаттар сэҥээрэллэрэ кэрэхсэбиллээх«, — диэтэ, тэрийээччилэргэ махтанна. Калмыкиялар соҕуруулар уонна хотулар биир ситимнэннибит диэн үөрэллэрин биллэрдилэр. «Күн табатыгар» кыттаары Саха сиригэр Монголияттан иккис төгүлүн кэлбит уран тарбахтаах Баянжаргал Баяндуурэн 40-тан тахса сыл ииһинэн дьарыктаммыт. Дойдуларыттан бу сырыыга эмиэ сонун, кэрэ үлэлэри аҕалбыттарын киэн тутта эттэ. Дьоҕуру сайыннарар туһалаах уонна далааһыннаах тэрээһиҥҥэ ыҥырбыттарыгар махтанна.
Куонкурус дьүүллүүр сүбэтин бэрэссэдээтэлэ, Москваттан кэлбит Раушан Канапьянова бастатан туран, А.Е.Кулаковскай аатынан норуоттар доҕордоһууларын дьиэтин дириэктэригэр Яна Игнатьеваҕа «Күн табата» диэн олус бэртээхэй, чаҕылхай ааты толкуйдаабытыгар махтанна. Итиэннэ бу чахчы олус интэриэһинэй, сэргэх уонна үс сыл иһигэр дьоһун хардыылары оҥорбут кэскиллээх тэрээһин буоларын бэлиэтээтэ. Дойдуларыгар киэҥ биһирэбили ылбыт, болҕомтону тардыбыт ааттаах-суоллаах маастардар биир түһүлгэҕэ түмсэн ураты кэрэ, сонун үлэлэрин бар дьоҥҥо көрдөрөллөрө улахан бэлэҕинэн буоларын эттэ. Омуктары сомоҕолуур улахан суолталаах тэрээһин сыллата үрдүк таһымнаахтык ыытылла турарыгар баҕарда.
А.Е.Кулаковскай аатынан норуоттар доҕордоһууларын дьиэтин дириэктэрэ Яна Игнатьева тымныыттан чаҕыйбакка куонкуруска кыттаары кэлбит хоодуот санаалаах ыалдьыттарга барҕа махтал тылларын анаата. «Айар дьоҕурдаах дьон түмсэр түһүлгэлэригэр география эмиэ улахан оруоллаах«, — диэтэ кини. Итиэннэ бу бэстибээл аан бастаан 2016 сыллаахха манна, Дьокуускайга, буолбутун, онно барыта 97 киһи кыттыбытын эттэ. Онтон былырыыҥҥы бэстибээл бастакы тэрээһин кыайыылааҕын дойдутугар, Забайкалье кыраайыгар Агинскай бөһүөлэгэр буолбут. Быйылгы «Күн табата» норуоттар икки ардыларынааҕы үһүс төгүлүн ыытыллар этническэй муода көһө сылдьар бэстибээлигэр, Дьокуускайга, 6о-тан тахса дизайнер-модельер, улуустартан уран тарбахтаахтар бастыҥнара, ону сэргэ, оскуолаттан уонна оҕо саадыттан муода көрдөрүүтүгэр кытталларын, хайысхаларынан ирдэбиллээх дьүүллүүр сүбэ үлэлиирин иһитиннэрдэ. Аата да этэрин курдук, бэстибээл чугастааҕы сылларга Алтайынан, Монголиянан, Казахстанынан көһө сылдьан ыытыллыаҕын эттэ.
Бэстибээли «Симэх» норуот ускуустубатын уонна уус-уран оҥоһуктарын национальнай киинэ, А.Е.Кулаковскай аатынан норуоттар доҕордоһууларын дьиэтэ тэрийэллэр. Тэрээһин СӨ култуураҕа уонна духуобунай сайдыыга министиэристибэтин, СӨ тас сибээскэ уонна норуоттар дьыалаларыгар министиэристибэтин, Дьокуускай куорат култуураҕа управлениетын, «Уус» норуодунай-художественай уус-уран оҥоһуктарга СӨ пуондатын, СӨ дизайнердарын сойууһун өйөбүллэринэн ыытыллар.
Сардаана БАСНАЕВА, «Саха сирэ» хаһыат, edersaas.ru
