Көнө суолга үктэммит дьахталлар тустарынан киинэ уһуллар

Бөлөххө киир:

Наркология өрөспүүбүлүкэтээҕи диспансерын  исписэлиистэрэ Саха сиригэр  Ийэ сылын чэрчитинэн,  «Ийэҕэ бэриллэр кыах» (“Шанс для мамы”)  бырайыагы олоххо киллэрэллэр.

edersaas.ru

Наркология диспансерын кылаабынай бырааһа Альбина Сивцева:

— «Ийэҕэ бэриллэр кыах»  социальнай бырайыакпытын Саха сирин Ил Дархана Айсен Николаев биллэрбит Ийэ сылыгар анаатыбыт. Биһиги бырайыакпыт сүрүн соруга – өрөспүүбүлүкэ дьахталларыгар уонна ийэлэригэр  чөл олоҕу сырдатыы. Ураты болҕомто Кангаласска баар реабилитация диспансерыгар эмтэнээччилэр социальнай-психологическай адаптацияны баралларыгар, ситиһиигэ уонна доруобай, актыыбынай олоххо көҕүлээһиҥҥэ уурулунна”, — диэн  кэпсээтэ.

Бырайыак чэрчитинэн  дьахталларга   өрөспүүбүлүкэҕэ биллэр дьону кытары көрсүһүүлэр ыытыллаллар, отделение психологтарын уонна  социальнай педагогтарын кытары  ситимнээх үлэ барар. Манна эмтэнээччилэр урукку  дьоҕурдарын сөргүтэллэригэр улахан болҕомто ууруллар – кинилэри иистэнэргэ, баайарга, оҕуруот көрөргө үөрэтэллэр.

«Мэдиссиинэ тиэмэтигэр идэтийбит Саха сирин биллэр-көстөр суруналыыстара Алла Клецкону уонна Зоя Игнатьеваны кытары Саха сиригэр дьахталлар арыгылааһыннарын  кыһалҕатыгар документальнай киинэни бэлэмниибит. Киинэҕэ наркологияҕа эмтэммит, билигин көнөр суолга турбут  дьахталлар, ийэлэр дьиҥнээх олохторо көрдөрүллүөҕэ. Ону сэргэ  дьахтар арыгылааһынын төрүөттэрин, ол содулун быһаарарга кыһаллыахпыт, диспансер психологтарын уонна социальнай үлэһиттэрин  үлэлиир ньымаларын көрдөрүөхпүт”, — диэн Альбина Сивцева үтүө сонунун үллэстэр.

Диспансер исписэлиистэрэ арыгыны уонна наркотигы утары охсуһар хайысхалаах ыстатыйалары тиһигин быспакка таһаараллар,  нарколог-быраастар уонна психологтар оскуола үөрэнээччилэригэр  уонна үөрэх тэрилтэлэрин устудьуоннарыгар лиэксийэлэри ааҕаллар.

Ону таһынан диспансер нарколог-быраастара, психологтара уонна социальнай үлэһиттэрэ кыттыылаах мобильнай десаннар өрөспүүбүлүкэ ыраах сытар улуустарыгар тиийэллэр.  Манна исписэлиистэр  нэһилиэнньэ доруобуйатын көрөллөр уонна куһаҕан дьаллыктары сэрэтэргэ  лиэксийэлэри ааҕаллар. Маннык десаннар Муома, Эдьигээн уонна Өймөкөөн улуустарыгар тиийэн миэстэтигэр үлэлээбиттэрэ.

Бэс ыйыгар наркология диспансерыгар эмтэнээччилэргэ Кэрэ буолуу күнүн ыытыы  уо.д.а. былааннанар.

«Бырайыакпытын үлэлэтэргэ  диспансербыт быраастара уонна психологтара бары кэриэтэ кытталлар. “Ийэҕэ бэриллэр кыах” бырайыакпыт  балачча көдьүүстээх буолуоҕар эрэнэбит”, — диэн Альбина Сивцева түмүктүүр.

Надежда ЕГОРОВА, «Саха сирэ», edersaas.ru

+1
0
+1
0
+1
0
+1
0
+1
0
+1
0
+1
0