Ямало-Ненецкэй автономнай уокурук Новый Уренгой куоратыгар атырдьах ыйын 20-29 күннэригэр «Легенды Севера» парковай скульптура IX норуоттар икки ардыларынааҕы фестиваль ыытылынна. Саха сириттэн Нам улууһуттан Роман Петров соҕотох ыҥырыллан тиийэн кыттан, кыайыы өрөгөйүн биллэ.
⠀
Фестивалга Саха сириттэн, Мордовияттан, Красанодарскай, Красноярскай кыраайдартан, Пензенскэй, Свердловскай, Томскай, Самарскай уобаластартан о.д.а. уопсайа 17 маастар талааннарын көрдөрдүлэр.
⠀
Ааттаах маастардар 9 күнү быһа бэс мастан Ямал төрүт норуотун фольклорун кэрэһэлиир айымньылары оҥорон таһаардылар. Роман Петров «Күн сардаҥалара» диэн үлэтин дьүүллүүр сүбэ бастыҥынан ааттаатта. Автор бэйэтэ этэринэн, бу айымньы боростуой киһи дьоллоох буолар ыра санаатын таайтаран көрдөрүү буолар.
⠀
Фестиваль бары кыттыылаахтарын дипломунан, бэлэҕинэн наҕараадалаатылар.
⠀
Биир дойдулаахпытын кыайыытынан истиҥник эҕэрдэлиибит! Айар үлэҕэр өссө үрдүк дабайыылары баҕарабыт.
⠀
Нам улууһун дьаһалтатын пресс-сулууспата
+1
+1
+1
+1
+1
+1
+1