Иенгра сэлиэнньэтигэр саастаах киһи эдэр ойоҕун күнүүлээн, саанан ытан өлөрдө.
РФ Силиэстийэлиир кэмитиэтин Саха сиринээҕи управлениета иһитиннэрбитинэн, балаҕан ыйын 24 күнүгэр Нерюнгри оройуонун Иенгра сэлиэнньэтигэр 43 саастаах дьахтар 58 саастаах киһилиин дьиэлэрин куукунатыгар арыгы иһэ олорбуттар.
Ол олорон, эр киһи дьахтарын «көссүүлэспиккин» диэн буруйдаан киирэн барбыт. Дьахтар буоллар, кыккыраччы мэлдьэспит. Онуоха эр киһи буолуохсут ойоҕун хаста да сирэйгэ, түбэһиэх сиргэ охсон-саайан, охторон түһэрбит. Дьахтар да хаалсыбатах — киһитин ыыс-бурут тылларынан үөхпүт.
Онуоха эрэ буолуохсут улаханнык өһүргэнэн, хоһугар барбыт, онно «МР Север» саатын ылбыт уонна төннөн кэлэн, ойоҕун төбөҕө ытан өлөрбүт.
Бу чахчынан «киһини соруйан өлөрүү» ыстатыйанан холуобунай дьыала тэрилиннэ. Уорбаланааччы тутуллубут.
Хаартыскалар: быһылаан буолбут сириттэн.