Бэс ыйын 21 күнүгэр ураты күн күүтэр. Күн муҥутуур уһуур кэмигэр, күнүс 3 чаас 40 мүнүүтэҕэ (Москва бириэмэтинэн сарсыарда 9 чаас 40 мүнүүтэҕэ) күн өлөр (солнечное затмение). Астрологтар күн өлөрүн көрөр куһаҕан дьайыылаах диэн этэллэр. Оччотугар, күнү көрсөр, ыһыахтыыр хайдаҕый?
Күн өлөр кэмэ муҥутаан уһаан турар кэмигэр түбэһэрэ бэрт сэдэх. Ол иһин бу күн ураты күүстээх диэн этэллэр. Ону тэҥэ, Ый, Күн өлөр кэмнэрэ чугасыһан, “көрүдүөр” диэн ааттаммыттар. Бэс ыйын 5 күнүгэр ый өлбүт, аны от ыйын 5 күнүгэр Ый өлөр, оччоҕо эрэ “көрүдүөр” бүтэр. Билигин 4 планета “ретрограднай” (төттөрү эргийэр) балаһыанньаҕар бааллар, ол эмиэ үчүгэйинэн дьайбат.
Күн өлөрө Африка диэки уот биһилэх буолан, хоруона курдук төгүрүччү көстүөҕэ, Азияҕа, Индияҕа, Кытайга Күн улахан аҥаарын Ый бүөлүүрүн көрүөххэ сөп. Арассыыйаҕа саамай үчүгэйдик Алтаай диэки көстүөҕэ. Оттон Саха сиригэр мөлтөхтүк көстүө, эбэтэр көстүө да суоҕун сөп. Күн өлүүтэ күнүс 5 чаас 32 мүнүүтэҕэ (Дьокуускай бириэмэтинэн) бүтүөхтээх.
Астрология үөрэҕинэн, бу кэмҥэ Күн уонна Ый Рак сулус бөлөҕүн дьайыытыгар бааллар. Рак киһи олоҕор дьиэ кэргэн, доҕоттор чаастарыгар эппиэттиир. Онон бу күн дьиэ кэргэҥҥитигэр, доҕотторгутугар болҕомтолоох буолуҥ, этиһиини, мөккүөрү таһаарымаҥ.
Бу күн сөпкө дьаһаннахха, инники олоххун уларытарга дьоһун хардыылары оҥоруоҥ. Бу олоххо тугу гына кэлбиккин, сөпкө баран иһэргин өйдүөхтээххин. Быһаарылла илик кыһалҕалар күөрэйдэхтэринэ, урукку алҕастары көннөрөр кэм кэлбит. Туох эрэ куһаҕаны олоххуттан туораттаххына, ол оннугар саҥа, үтүө быһыы киирэн, оннун булуо. От-мас, уу ситэн, ураты күүһүрэн турар кэмнэрэ, онон уунан суунар үчүгэй.
Күн өлөр кэмигэр эчэйии, албыннатыы, куһаҕан сураҕы истии, о.д.а. мөкү быһыылар тахсыахтарын сөп. “Көрүдүөр” кэмигэр хайдах дьаһанаҕын, олороҕун да, бу сыл оннук ааһыаҕа.
Оччотугар, күн өлөр кэмигэр ыһыахтыыр, күнү көрсөр хайдаҕый? Туймаада ыһыаҕын күнү көрсүү сиэрэ-туома бэс ыйын 21 күнүгэр түүн 2 аҥаар чаастан араадьыйанан саҕаланар. Ол эбэтэр Күн өлүө 13 чаас иннинэ буолар. Онон күнү көрсөн баран, дьиэҕэ тахсан, утуйан туран баран, күнүс Күн өлөрүн көрөртөн туттунар сөп. Алгыһы күнүс 11.55 чааска саха тэлэбиидэнньэтигэр саҕалыыллар, ону дьиэҕэ да олорон көрүөххэ сөп. Оттон айылҕаҕа тахсан күүс-уох ылар буоллахха, бэс ыйын 22 күнүгэр барар ордук курдук.
Ангелина Васильева, “Саха сирэ” хаһыат, edersaas.ru
Хаартыска: tass.ru