Сүрүн Уопсастыба

Күн-дьыл туруга: Тохсунньу сылаас буолуо

Саха сиригэр тохсунньу 5 күнүгэр 31 нэһилиэнньэлээх пууҥҥа 45 кыраадыстан өссө намыһах, тымныы күн буолбут. Дьокуускайга сарсыарда 9 чааска 44 кыраадыс тымныы, тыала суох этэ.

Оттон 9 нэһилиэккэ 50 кыраадыстаах тымныы түспүтэ бэлиэтэнэр. Ол курдук, Булуҥ улууһун Күһүүрүгэр, Томпо оройуонун Теплый Ключ сэлиэнньэтигэр – 50 кыраадыс, Таатта улууһун Ытык Күөлүгэр, Өлөөҥҥө, Томпо Кириэс-Халдьаайытыгар – 51, Верхоянскайга, Эдьигээн Бэстээҕэр, Үөһээ Бүлүүгэ уонна Ньурбаҕа – 52 кыраадыс тымныы буолбут.

Тоҥ мас тоһута барар, тохсунньу тоһуттар тымныыта диэн маны этэн эрдэхтэрэ! Ол да буоллар, саҥа сылга этэҥҥэ үктэннибит, күммүт кутуйах хаамыытынан уһуур, сырдыыр. Тохсунньу 5 күнүгэр күммүт 22 мүнүүтэ уһаата. Күн уһуна – 5 чаас 30 мүнүүтэ.

Gismeteo, Yandex, Sinoptik саайтар көрдөрөллөрүнэн, Дьокуускайга тохсунньу 8 күнүттэн күн-дьыл сылыйан барыа. кэлэр нэдиэлэҕэ 30 кыраадыска тиийэ сылыйара күүтүллэр. Бу саайтар тохсунньу ый сылаас буоларын билгэлииллэр.

Бу күннэргэ Бүлүү умнаһын улуустарыгар ордук тымныйан турар. Ол эрээри, номнуо сарсыҥҥыттан сылыйан барарын интэриниэт көрдөрөр. Бу улуустарга тохсунньу ыйга 10 кыраадыска тиийэ сылыйыан сөп.

Ангелина Васильева, “Саха сирэ” хаһыат, edersaas.ru

Хаартыска: ykt.ru

0
1
Telegram @edersaas20